Misa, Bayubay nanghawod sa Mabolo annual fiesta chessfest

CEBU, Philippines - Sila si Justin Misa ug Alex Bayubay maoy nanghawod sa bag-o lang natapos nga 2016 Barangay Mabolo Annual Fiesta Chess Tournament didto sa Mabolo Elementary School Cultural Center.

Si Misa migamit og lig-on nga Ruy Lopez aron pagpukan ni Rodolfo Ang sud sa 37 ka duso sa katapusan niyang duwa, samtang si Bayubay mitak-op sa iyang kampanya pinaagi sa pagpilde ni Hector Villamora human sa 35 ka duso ginamit ang Sicilian defense.

Pareho nilang gitapos ang 7-round Swiss system tournament alang sa class B players (non-rated) bitbit ang 6.0 puntos, apan si Misa maoy mipatong sa unang puwesto gumikan sa mas taas niyang tie-breaker. Si Misa midaog og P3,000, samtang si Bayubay nakadawat og P2,000.

Sila si Villamora, Norvil Tagnipis, Duane Borgonia, ug Edsel Vosotros pulos mirehistro og 5.5 puntos, apan si Villamora maoy miangkon sa P1,000 nga 3rd prize.

Naglangkob sa top 12 nga dunay 5.0 puntos matag usa mao sila si Rodolfo Ang, Bonjoe Lanorias, Laila Nadera, Reshie Rolan, Christian Pondoyo ug Alberto Rivera. (BANAT PALARO)