Store, Lahug 2-0 na sa Duty Free Sportsfest

CEBU, Philippines - Midaog gyud pinaagi sa overtime ang DFP-Store sa ilang kulbahinam nga duwa batok sa DFP-Mactan, 59-53  sa nagkainit nga aksiyon sa Duty Free Sportsfest season 5 basketball tournament niadtong Martes sa gabii didto sa Telof  hardcourt sa  Barangay Subangdaku, dakbayan sa Mandaue.

Si Jomar  Toyugan maoy mipakita og maayong salida sa maong duwa ilabi na sa overtime period aron mahimong bida sa dakung kadaugan sa DFP-Store ni playing coach Ogie Cenabre.

Miarte sab og maayo si Lee Galapin alang sa DFP-Store nga nakalabang  gikan sa lawod sa kalisdanan.

Sila si Toyugan ug Galapin parehong mibagdok og 16 puntos alang sa ilang 2-0 nga baraha ug ingon pag-abante sa sunod hugna.

Gihatagan unta og higayon ang DFP-Mactan pagkawat sa daog dihang nakaigwalis sila, 44-all sa daginutong segundos sa final period, apan ang ilang sinaligan nga si George Arnibal misipyat sa iyang bonus free throw hinungdan sa overtime.

Si Arnibal mitikdol og 17 puntos, samtang si Yo Neumeran mitimang og 12 puntos alang sa DFP-Mactan nga adunay 0-2 win-loss record.

Sa laing aksiyon,  si Kikim Tajo nga wala makaiskor sa una niyang duwa namawi dihang miburak siya og 14 puntos aron pangulohan ang opensa sa DFP-Lahug nga milubong sa DFP-Warehouse sa iskor nga 47-31.

Sa second quarter pa lang, ang DFP-Lahug nakapanimaho na sa ilang sayong kadaugan human moposte og 32-15 nga bentaha sa halftime.  Mibingat pa ang labaw ngadto sa 22 puntos, 46-28  sa free throws ni Carl Tajo.  Si Tajo nga maoy topscorer sa unang duwa nalimitahan lang ngadto sa tres puntos.

Bugtong si Amber Cajes lang ang miiskor og double figures alang sa naparot nga DFP-Warehouse nga igo gyud nakaabot og 10 puntos.

Ang tinuig nga sportsfest gidumala nilang Ogie Cenabre ug Gani Tajo.

Puntos matag usa

Unang duwa:

DFP-STORE (59) – Galapin 16, Toyugan 16, J. Cenabre 9, Arangcon 8, Suycano 8, O. Cenabre 2.

DFP-MACTAN (53) – Arnibal 17, Neumeran 12, Monterde 6, Bregente 6, Paquibot 4, Tomarse 4, Oral 2, Estrada 2.

Ikaduhang duwa:

DFP-LAHUG (47) – K. Tajo 14, Ebardo 10, Nayon 9, Santisas 4, Tito 3, C. Tajo 3, G. Tajo 2, Casquejo 2.

DFP-WAREHOUSE (31) – Cajes 10, Cutillar 9, Orticio 8, Delantar 2, Genon 2.  (BANAT NEWS)