Abueva tataw na nga mosakmit sa BPC award
CEBU, Philippines - Dugay nang napakita ni Alaska Aces forward Calvin Abueva nga usa siya sa mga superstar sa liga, apan wala pa siya makadaog og bisan usa pa nga PBA individual awards.
Ning higayona, gipaabot nga maangkon na ni Abueva ang labing una niyang award nga mao ang Best Player of the Conference sa Commissioner’s Cup.
Si Abueva nga mipakita sa iyang ka maayong laki pinaagi sa pag-agak sa Aces ngadto sa semifinals sa Commissioner's Cup giatngan na nga modawat sa award. Ang gitawag nga 'The Beast' sa liga adunay 33.1 statistical points karon nga conference, nagsunod ni Greg Slaughter sa Barangay Ginebra, apan segurado na kining maapsan tungod kay natagak man ang Ginebra.
Mikompleto sa top five sa stats mao sila si GlobalPort pointguard Terrence Romeo (33.0), Tropang TNT star Jayson Castro (29.8) ug Carlo Lastimosa sa Blackwater ug JuneMar Fajardo sa San Miguel nga nagtabla sa ikalimang dapit sa ilang 28.5 SPs.
Misaka ang produksiyon sa opensa ug depensa ni Abueva human ma-injured ang laing sinaligan sa Alaska nga si Vic Manuel. Si Abueva mi-average og 18.0 points, 7.6 rebounds ug 2.7 assists.
Samtang sa lumba alang sa 'Best Import' award, tulo karon ka pangan ang migawas nga kusog nga kandidato human usab ang nag-una nga si Tyler Wilkerson sa San Miguel gipapauli sa Estados Unidos tungod sa wala nila pagkasinabtanay.
Nag-una karon si Meralco Bolts import Arinze Onuaku, apan delikado gihapon siya nga maapsan nila ni Pierre Henderson Niles sa Rain or Shine ug Rob Dozier sa Alaska Aces. Ang modaog sa maong award magdepende kun kinsa sa tulo ka koponan ang molahutay (BANAT NEWS)
- Latest