Sabillo nagpanikad na sa OPBF title fight
CEBU, Philippines - Si kanhi world champion Merlito ‘Tiger’ Sabillo mipadayag nga andam ug kondisyon na kaayo siya alang sa umaabot niyang title fight batok sa Hapon nga si Riku Kano karong Mayo 8 didto sa Bunka Center sa Sanda, Hyogo, Japan.
Ang kanhi batos sa ALA Boxing Gym makigharong batok sa 18- anyos nga si Kano alang sa interim Orient Pacific Boxing Federation (OPBF) minimumweight title.
“Wala na akong problema sa timbang,” matud pa ni Sabillo segun sa taho ni Lito de los Reyes sa Philboxing.com.
Ang garbo sa Toboso, Negros Occidental dunay 25-2-1 win-loss-draw record uban ang 12KOs.
Ang 32-anyos nga si Sabillo mao kanhi ang WBO 105-pound champion, apan nahuboan sa iyang bakus human gipakamang sa Mehikanong si Francisco Rodriguez Jr. niadtong Marso 22, 2014 didto sa Mexico. Gisundan kini og laing mapait nga kapildihan sa mga kamot ni Ellias Nggenggo pinaagi gihapon sa TKO dinhi sa dakbayan sa Sugbo niadtong Nobiyembre 15, 2014.
Apan human mipirma og kontrata uban sa Highlands Promotions ni international promoter-manager Brico Santig, si Sabillo mibangon pinaagi sa pagposte og duha ka sunod-sunod nga daog pinaagi sa desisyon batok nilang Powell Balaba ug Jack Amisa niadtong Nobiyembre 29 sa miaging tuig didto sa La Trinidad, Benguet.
Dili hinuon basta-basta ang iyang sangkaon nga si Kano kay gawas nga mas bata midaog sab sa katapusan niyang pito ka away diin upat niini pinaagi sa knockout. (BANAT NEWS)
- Latest
