Cavs miangkon sa game-1

CEBU, Philippines - Nahimong  sentro sa atensiyon si LeBron James  sa  dihang gibihag sa Cleveland Cavaliers  ang Atlanta Hawks, 104-93 sa Game-1 sa ilang  “best-of-seven” Eastern Conference semifinals kagahapon  didto sa Quicken Loans Arena didto sa Cleveland, Ohio.

Si  James  miratsada og 25 puntos, apan ang labing mahinungdanon mao ang pagtukob niya og duha ka steals sa nanghinapos nga bahin sa duwa nga maoy nakasalbar sa Cavaliers taliwala sa mainit nga pakigbisog sa Hawks.

Mitampo og 21 puntos uban ang walo ka assists si Kyrie Irving alang sa Cavaliers nga mipahimus og maayo sa taas-taas nilang pahuway human gisirohan, 4-0, ang Detroit Pistons sa first round sa playoffs.

Si Dennis Schroder maoy topscorer sa Atlanta uban sa iyang 27 puntos, unom ka assists ug tulo ka rebounds. Si Paul Millsap midugang og 17 puntos, samtang si Kent Bazemore miiskor og 16, apan nakawang lamang ang ilang paningkamot sa habig sa Hawks.

Didto sa Western Conference, si Russell Westbrook mipatuasik og 29 puntos alang sa Oklahoma City Thunder nga nakabawos sa San Antonio Spurs sa makapaisag balhibo nga kadaugan, 98-97, didto sa AT&T Center.

Si Kevin Durant midugang og 28 puntos alang sa Thunder nga dali nga nakabangon human gilubong og 32 puntos sa Spurs sa miagi nilang sangka.

Si LaMarcus Aldridge miayag og 12 puntos uban ang walo ka rebounds ug tulo ka assists apan nakawang lamang ang iyang kahago sa Spurs. 

Human siya nakapasud og duha ka free throws aron pagpasikit sa iskor, 97-98, duna pa unta sila’y tsansa nga modaog apan si Patty Mills nasipyat sa iyang 3-pointer sa nahabiling dos segundos sa duwa.

Mao pa lamang kadto ang ikaduhang higayon nga nahagba ang Spurs didto sa ilang balwarte diin sila mikulit og 40-1 record atol sa regular season. (BANAT NEWS)