Alaska o Meralco?

CEBU, Philippines - Masuta na kun kinsa sa Alaska Aces o Meralco Bolts ang mas gutom sa finals berth sa dihang magsangka sila sa katapusang higayon sa semifinals sa 2016 PBA Commissioner’s Cup karong gabii didto sa Smart Araneta Coliseum.

Ang “do-or-die” Game-5 sa Aces ug Bolts  sugdan  sa alas-7 sa gabii.

Laraw sa Alaska nga mosakmit sa ikatulo  nilang sunod-sunod nga PBA finals diin   napakyas sila sa unang duha nila ka pagsuway nga makuha ang korona, samtang ang Meralco gusto nga motilaw sa labing una nilang finals appearance.

Napugos sa Bolts ang series ngadto sa usa ka “sudden-death” series dihang gitutyo nila ang Aces sa Game-4 sa iskor nga 86-70 niadtong Lunes.

Human sa ngil-ad nilang kampanya sa miaging All-Filipino Cup, ang Meralco gusto nga mopahimus sa kahigayonan nga makahimo og usa ka makasaysayanong konperensiya ubos sa giya ni coach Norman Black.

Balanseng opensa ang nahimong yawi sa kalampusan sa Bolts ug nanghinaot si Black nga makapakita gihapon og nindot nga labok ang iyang mga key players sama sa ilang import nga si Arinze Onuaku, Cliff Hodge, Chris Newsome, Reynel Hugnatan ug Jared Dillinger, kinsa migawas nga usa sa mga mahinungdanong offensive player sa koponan.

Sa ilang bahin, human mapakyas sa pagsira sa semifinals niadtong Lunes, ang Aces mosuway pagbalik, apan ning higayona mibahad si Alaska coach Alex Compton nga bangis sila   karon aron hingpit nang matakda ang ilang finals showdown batok sa nagpaabot nga Rain or Shine Elasto Painters.

Ang leading Best Player of the Conference candidate nga si Calvin Abueva nagtuo nga kinahanglan niya nga mabawi iyang kaugalingon human sa bugnaw niyang duwa sa Game-4 diin igo lang siyang mipugnit og 10 puntos.

Si Abueva makigtambayayong sa import nga si Rob Dozier ug sa mga lokal sama nilang Cyrus Baguio, Chris Banchero ug Sonny Thoss aron mapukan sa hingpit ang Bolts. (BANAT NEWS)