Rain or Shine nakatayming og lig-ong import
CEBU, Philippines - Tagsa ra modayeg si multi-titled coach Yeng Guiao ngadto sa iyang mga players, apan wala siya kapugong sa pagpadayeg sa import niyang si Pierre Henderson Niles.
Si Niles gikonsiderar ni Guiao nga misalbar sa ilang kampanya sa PBA Commissioner’s Cup diin milampos sila pag-angkon og laing finals berth niadtong Domingo dihang ilang gitagak ang perennial title contender nga San Miguel Beermen sa Game-4 sa ilang “best-of-seven” semifinals series.
Si Niles maoy ikatulong import nga gikuha sa Rain or Shine hulip sa nag-unang duha nga si ex-NBA Antoine Wright ug si Mo Charlo.
Ang 270 lbs. nga si Niles daku kaayo og natabang sa depensa sa Painters diin siya ang mipugong sa duha ka mga higante sa PBA nga sila si Greg Slaughter sa Barangay Ginebra atol sa quarterfinals ug JuneMar Fajardo sa San Miguel dihang miduwa sila sa semis.
Uban ni Niles, ang Painters laraw nga mosakmit sa ikaduha nilang PBA franchise title nga katapusan nilang natilawan niadtong tuig 2012.
Ang Painters nagpaabot na lang karon sa modaog sa semifinal series tali sa Alaska Aces ug Meralco Bolts. (BANAT PALARO)
- Latest