AFN realtor, 5-0 na’s LABA Prexy cup 2016

CEBU, Philippines - Nalansang ang daog sa team Monterroyo human kini miposte og 3-0 nga sugod dihang gipahamtangan sila og duha ka sunod-sunod nga pilde, ning higayona batok sa Los Amigos, 68-79 sa LABA President’s Cup 2016 First Conference niadtong Biyernes sa gabii didto sa Barangay Banilad gym, Mandaue  City.

Ang Monterroyo ni team  manager Dr. Raul Monterroyo, kansang daog naungot  agresibo kaayo sa first half.  

Nausab ang dagan sa duwa sa third period   diin sila na ang naggukod ug gilubong pa og 10 puntos, 34-44 sa sayong bahin sa maong kuwarter dihang     naguba ang ilang game plan.

Misikit unta ang Monterroyo ngadto sa tres puntos, 46-49 human sa itsa ni Dr. Monterroyo, apan dali usab misukli og mga puntos ang Los Amigos aron inaton pagbalik ang labaw.

Sila si Rey Gonzaga ug Richard Jordan nga nagkabangi maoy topscorer sa tagsa-tagsa nila ka koponan. Si Gonzaga mitikdol og 20 puntos aron pangulohan ang  Los Amigos, samtang si Jordan mitimang og 21 puntos alang sa Monterroyo.

Sa main game, ang wa’y pildeng AFN Realtor segurado na nga moabante sa sunod hugna human mirehistro sa ilang ikalimang daog.

Ang AFN Realtor ni Arnold Pestaño wa’y puangod nga milubong sa RMD, 97-74 aron mag-una sa standing bitbit ang 5-0 nga baraha.

Si Barak Rector maoy nangu sa AFN nga mipupo og 16 puntos, samtang gipangulohan sab ni Banjo Hatamosa ang naparot nga RMD sa iyang 14 puntos.

Human mibagdok og  20-16 nga bentaha sa first period,  ang AFN hinay-hinay nga mikamang ug mitala sa labing daku nilang labaw, 93-72 sa final period sa basket ni Richard Limosnera.

Bisan pa sa maong makabungog nga labaw, si Merot Ygoña nga maoy kasamtangan ni-coach sa AFN tungod sa injury wala gyud  kompiyansa kay bisan sa kadaginuton sa oras mipatawag gihapon siya og time-out aron maseguro ang  kadaugan.

Ang liga namugna pinaagi sa paningkamot ni LABA president ug Banilad barangay councilor Gilbert Sebandal. Ang mga duwa ubos sa superbisyon nilang  Adie Cinco ug Lloyd Chavez. (BANAT PALARO)