SWU men’s sud sa semis sa Nestea beach volley

CEBU, Philippines - Miabante sa semifinals ang Southwestern University Spiking Cobras human nila gipukan ang University of Santo Tomas sa 2016 Nestea Beach Volley Championships kagahapon didto sa Boracay Island.

Human sa ngil-ad nga opening set, ang tandem nila ni Rommel Pepito ug Alden Dave Cabaron miharos sa duha ka sets, 18-21, 22-20 ug 15-9 aron modaog.

Daku ang kahigayonan nga makabangga sa SWU ang laing Cebuano team nga University of San Jose-Recoletos sa sunod round kun modaog ang nauwahi sa ilang sunod nga sangka.

Sa laing bahin, ang SWU Lady Spikers nila ni Therese Rae Ramas ug Floremel Rodriguez midaog sa ilang opening match batok Adamson University, 21-19, 21-17. Ang University of the Visayas nila ni Kent Verbosidad ug Alastair Gairanod mirehistro og 21-10, 23-21 nga kadaugan batok Lyceum of the Philippines University, apan ang defending men’s champion University of Southern Philippines gitagak sa Colegio del San Agustin, 21-19, 21-16. (BANAT NEWS)