Batang Gilas champion sa SEABA

CEBU, Philippines - Ang Batang Gilas maoy mikampiyon sa 2016 SEABA U18 Championship human ilang gilubong ang Thailand, 86-49 sa miaging gabii didto sa Medan, Indonesia.

Subling gipakita sa Batang Gilas nga sila ang labing dominanteng junior basketball team sa Southeast Asia.

Sila si Joshua Sinclair ug Gian Mamuyac nga maoy nangulo sa nagbagang opensa sa Batang Gilas sa ilang 15 ug 14 puntos matag usa. 

Naglabaw og dos puntos ang Thailand sa first period, 19-17, apan miarangkada ang Batang Gilas aron moiskor og 37 puntos nga kadaugan.

Sa wala pa ilang finals match batok sa mga Thailand, ang mga Pinoy miharos sa elimination round diin ilang gipangpukan ang Laos, Malaysia,  Singapore ug host team  Indonesia.

Ang Batang Gilas nakasugat og sayon nga kompetisyon sa SEABA, apan ang ilang dominanteng kalampusan mohatag kanila og momentum paingon sa tinuoray nga misyon nga mao ang pagdaog sa FIBA Asia Championship karong Hulyo didto sa Iran. (BANAT NEWS)