Import sa San Miguel gipapauli

CEBU, Philippines - Gipapauli sa San Miguel Beermen ang ilang high-scoring import nga si Tyler Wilkerson ug dili patiwason og duwa sa PBA Commissioner’s Cup tungod sa dili maayong kinaiya niini.  

Ang San Miguel niduwa nga wa’y import  batok sa Rain or Shine Elasto Painters  sa Game-3 sa iskor nga 104-98 niadtong Huwebes. Ang coaching staff sa San Miguel nga gipangulohan ni coach Leo Austria nagkanayon nga kinahanglan na nila nga papaulion si Wilkerson sa Estados Unidos tungod sa batasan niini ug wala na kini maayong relasyon sa mga coaches ug pipila ka players sa koponan.

Gianugonan si Austria ilabi na nga usa ka lig-ong import si Wilkerson, kinsa nag-unang kandidato  alang sa karera sa Best Import of the Conference award, apan nagtuo nga makiangayon ang desisyon tungod kay lisud sabton ang batasan sa import.

Si Wilkerson gikataho nga nag-walkout atol sa ilang kapildihan sa Game-2 sa semifinals ug wala na kini mipatuo sa mga coaches.

Gumikan niini, ang Beermen nga tuyo nga mobangon   ug motabla sa series sa Game-4 karong Domingo, mikuha pagbalik  ni AZ Reid.

Si Reid moabot karong adlawa dinhi sa Pilipinas ug moduwa dayon kini ugma didto sa Smart Araneta Coliseum diin paninguhaon niya nga mapugos ang ilang best-of-five semifinals series ngadto sa usa ka 'do-or-die' game. Si Reid mitabang sa Beermen sa miaging 2015 Governors’ Cup diin sila mikampiyon. Atol sa maong conference, si Reid mi-average og 29.5 points ug 12.3 rebounds. (BANAT NEWS)