SWU daog, apan USPF, USJ-R nangapilde

CEBU, Philippines - Ang Southwestern University misidlak sa unang adlaw sa ilang kampanya, apan ang laing duha ka Cebu teams nahagba pagsugod sa Nestea Beach Volley Championships kagahapon didto sa isla sa Boracay.

Gitimonan nilang reigning CESAFI MVP Alden Dave Cabaron ug Rommel Pepito, ang SWU-Phinma Education milampurnas nilang  John Acain ug Mart Tubil sa Negros Oriental State University, 21-11, 21-18 aron pag-abante sa sunod nga hugna.

Apan naminghoy ang defending men’s champion University of Southern Philippines Foundation nga girepresentahan nilang Left John Tormis ug John Derrick Jason Reyes gumikan kay nalabay sila sa loser’s bracket uban nilang Kent Jay Verbosidad ug Alastair Gairanod sa University of San Jose-Recoletos.

Sila si Tormis ug Reyes naparot sa mga kamot nilang Philip Michael Bagalay ug Paul John Cuizon sa NCAA champions Mapua Institute of Technology, 21-14, 21-15. Sila si Verbosidad ug Gairanod nabiktima sab sa maong tandem sa Mapua sa iskor nga 13-21, 24-22, 15-8.

Gumikan niini, ang USPF ug USJ-R kinahanglan nga modaog batok sa Colegio de San Agustin ug Lyceum University sa tinaktakay nilang duwa karong adlawa aron dili matagak og  sayo. (BANAT NEWS)