Alferez misakmit duha ka quarters berth sa Gullas Cup
CEBU, Philippines - Ang Palarong Pambansa gold medalist nga si Zethley Mae Alferez miangkon og duha ka luna sa quarterfinals sa duha ka managlahing dibisyon sa 21st JRG Gullas Tennis Cup kagahapon didto sa Consolacion Tennis Club sa Barangay Laray, Consolacion.
Si Alferez unang miangkon og quarters berth pinaagi sa usa ka dominanteng 6-1, 6-1 nga kadaugan batok ni Pink Floyd Manabat sa under-16 class. Wala usab siya paningta sa pagkuha sa pagmartsa sa round of 16 sa under-18 tungod kay nakapahimus siya dihang nahimo siyang ‘bye’.
Uban ni Alferez sa quarterfinal round mao sila si Patricia Velez, Kara Salimbangon, Joyette Moto ug Shyne Villareal.
Sa iyang bahin, miagi pa og kalisud si Edhel Parangan una makasulod sa quarterfinal sa under-16 dihang midaog siya sa usa ka super tie break batok ni Camille Villar, 6-2, 1-6, 10-7.
Laing Palarong Pambansa medalist nga si Jose Maria Pague naka-double quarterfinals slot usab sa boys 16 ug boys 18 divisions, samtang si Tyler Labrador misulod usab sa round of 16 sa unisex under-10 ug si John David Velez miabante sa sunod round sa boys 12.
Mga misulod sa quarterfinals sa girls 14 mao sila si Ellaine Bahunsua, Nicole Villar, Lyrah Repollo,Tiffany Nocos ug Shedel Gica. (BANAT NEWS)
- Latest
