HLY, Pardo Builders milubong sa ilang kontra

CEBU, Philippines - Misalida og maayo silang Julian Capala ug Eric Espinosa alang sa HLY nga   milubong sa Water Market,  109-86 sa Power Forty Basketball League 2016 President Cup niadtong Martes sa gabii didto sa Inayawan Sports Complex.

Si Capala mikadlit og 24 puntos, samtang si Espinosa mikabkab og 23 puntos  aron pangulohan ang balanseng opensa sa HLY nga nagbitbit na og 2-1 nga baraha.

Nakatampo sab og daku sa maong kadaugan mao sila si Alex Mercado nga mitimbre og 14 puntos, Cocoy Dequit sa iyang 11 puntos ug Tata Fernandez nga adunay 10 puntos.

Kontrolado sa HLY ang  duwa ug namintinar nila ang double digits nga labaw sa  fourth period nga naghawan sa ilang dalan paingon sa kadaugan. Ang team owner nga si  Atty. Flor Yosores ug commissioner Edwin Dejacto Sr. nagkuridas og singko puntos.

Ang 1-2 nga Water Market gipangulohan sab ni Bodak Tantiado pinaagi sa iyang 20 puntos, gisundan nilang Mike Veloso ug Celso Cabaluna nga parehong mikandos 16 puntos ug team owner Vez Eleguin nga mihabwa’g 14 puntos. 

Sa laing aksiyon,  ang Pardo Builders midemolis sa Labarca Trading, 115-102 alang sa una nilang daog.

Makabungog nga 44 puntos ang nahimo ni Julius Gastador aron pangulohan ang opensa, samtang si Pablo Cabrera mitampo’g 32 puntos.

Nangu sa Labarca Trading mao si Danny Lim nga mihakot og 28 puntos. Sila si Jun Abapo ug Teody Ebrado ug Ramon Ceballos  pulos sab mihimo’g double-digits performance alang sa  Labarca Trading. 

Ang Pardo Builders ug Labarca Trading parehong nagtangag og 1-1 nga baraha ning maong torneyo nga gipasiugdahan sa Power Forty ballclub ubos sa liderato ni El Presidente Lando Almojallas sa abag ni Dome Ozon.

Puntos matag usa

Unang duwa:

HLY (109) – Capala 24, Espinosa 23, Mercado 14, Dequit 11, Fernandez 10, Sumargo 8, F. Yosores 5, Dejacto 5, Alcordo 3, Navares 2, Nacional 2, S. Yosores 2.

WATER MARKET (86) – Tantiado 20, Veloso 16, Cabaluna 16, Eleguin 14, Jaca 8, Moniva 8, Sandal 2, Chiong 2.

Ikaduhang duwa:

PARDO BUILDERS (115) – Gastador 44, Cabrera 32, Rosito 8, Navares 8, Solatorio 7, Dayondon 6, Cayobit 4, Espinosa 4, Villaner 2.

LABARCA TRADING (102) – Lim 28, Abapo 25, Ebrado 16, Ceballos 10, Montuis 8, Abellanosa 6, Abellana 5, Echavez 1. (BANAT NEWS)