Warriors sa 2nd round

CEBU, Philippines - Bisan og wala kaduwa ang superstar nilang si Stephen Curry, maora’g wa’y nabagatan nga problema ang Golden State Warriors dihang yano nilang gidemolis ang Houston Rockets, 114-81, aron pagmartsa ngadto sa ikaduhang hugna sa NBA Western Conference playoffs series kagahapon  didto sa Oracle Arena sa Oakland, California.

Gipasawop sa Warriors ang Rockets sa baraha nga 4-1 ug ilang sangkaon sunod ang modaog sa serye tali sa Portland Trail Blazers ug Los Angeles Clippers nga nagtakilid karon kay dili na man makaduwa ang duha nila ka sinaligan nga sila si Chris Paul ug Blake Griffin.

Ang Trail Blazers mao na karon ang nag-una, 3-2, human ilang gipakaging ang Clippers, 108-98 sa Game-5.

Si Golden State coach Steve Kerr nga midawat sa iyang NBA Coach of the Year award sa wala pa sugdi ang duwa, midayeg sa teamwork sa iyang koponan kay bisan og sila kulangan, kanunay sila mag-ambahan ngadto sa kalampusan.

“Literally every single guy on our roster contributed during this series,” matud pa ni Kerr.

Timaan niini ang beteranong si Shaun Livingston nga nindot kaayong mihulip sa dapit ni Curry human mitapos og 16 puntos. Wala na’y duda pa ang resulta human ang Warriors  miposte og  17 puntos nga labaw sa unang kuwarter,  37-20.

Didto sa LA, si CJ McCollum mitapos og 27 puntos sa Blazers, samtang si Damian Lillard mirapido og 16 sa iyang 22 puntos sa katapusang hunat sa duwa nga maoy hingpit nga nakabugha sa Clippers.

Sa laing duwa, ang Charlotte Hornets mipakurat na sab sa Miami Heat, 90-88 aron pag-ilog sa labaw sa ilang serye, 3-2.

Si Courtney Lee maoy nahimong bayani sa Hornets human siya mipasud og krusyal nga 3-pointers sa nahabilin nga 30 segundos nga maoy nakaaswat nila sa kadaugan. (BANAT NEWS)