Krusyal nga Game-3 sa Alaska, Meralco
CEBU, Philippines - Buk-on karon ang panagtabla sa Alaska Aces ug Meralco Bolts sa krusyal nga Game-3 sa ilang “best-of-five” semifinals series sa PBA Commissioner’s Cup didto sa Smart Araneta Coliseum.
Ang duwa sugdan karong alas-7 sa gabii.
Nagtabla ang duha sa series, 1-1 human mibawos ang Meralco sa Game-2 sa iskor nga 92-87 niadtong Miyerkules nga nakabuhi sa ilang paglaum nga moabante sa finals.
Si Aces coach Alex Compton naleksiyon sa ilang kapildihan diin naglabaw unta sila og double digits sa hinapos nga minuto sa final period sa wala pa moarangkada ang Bolts.
Ning higayona, dili na mokompiyansa pa ang Alaska tungod kay usa ka delikadong koponan ang Meralco ni coach Norman Black.
Nagkanayon si Compton nga yawi sa ilang kadaugan karon mao nga sayong moposte og daku nga labaw ug panalipdan kini hangtod sa katapusang segundo sa duwa.
Naulian na ang scoring ni Aces import Rob Dozier, kinsa miiskor og 28 puntos sa miaging duwa, apan nabalaka si Compton kay mibalik usab ang nindot nga duwa sa import sa Bolts nga si Arinze Onuaku. (BANAT NEWS)
- Latest
