Gullas mipasidungog nilang Pages, Tabura

CEBU, Philippines - Ang tinamod nga Sugbuanong sportsman, educator ug pilantropo nga si Jose ‘Dodong’ R. Gullas mihatag og pasidungog ngadto nilang John Pages ug coach Fritz Tabura gumikan sa daku nilang natampo sa kalampusan ug pag-ugmad sa JRG Gullas Tennis Cup sa milabay’ng duha ka dekada.

Gikan sa gamay niining sinugdanan niadtong tuig 1995, ang Gullas Cup inanay nga mitubo dayon na ngadto sa pagsulbong isip labing daku ug labing karaan nga junior tennis event sa nasud gawas sa Metro Manila.

Karon nga naabot na sila og 21 ka edisyon, si Gullas nagbalik lantaw sa kagahapon uban sa mapasalamaton niyang kasingkasing. Alang kaniya, ang torneyo nga iyang gipundar alang sa mga kabatan-onan dili makaabot sa maong gidugayon kun dili pa sa pag-ambahan nilang Pages ug Tabura kaniya.

“It seems but only yesterday when you and I came into a very timely agreement to develop a tennis program for the youth so that they will never, never, never go into drugs, be more focused in their studies and be more prayerful and God fearing. John, you made this annual program possible for Dodong for 21 long years," mensahe pa ni Gullas nga gikulit sa espesyal nga plaque nga personal niyang gitunol ngadtong Pages atol sa pormal nga pagbukas sa 21st JRG Gullas Tennis Cup kagahapon didto sa Consolacion Tennis Club sa Barangay Laray, Consolacion. 

“Your helping hands have really touched Dodong with your kind assistance in the staging of the Jose R. Gullas Tennis Cup for the youth for 21 long years," matud pa ni Gullas sa laing mensahe pasalamat ngadtong coach Tabura.

Sa iyang bahin, si Pages nagkanayon nga nasurprisa gyud siya sa maong pasidungog dayong litok sa mga pulong pagtamod ngadtong Gullas.

“This award, we all should have given this to sir Dodong. Among all the Cebuanos I know, sir Dodong exemplifies the spirit of a true Christian and he’s truly a model for the kind of life he leads, something that we all should follow,” matud pa ni Pages.

Atol sa pagbukas sa lima ka adlaw nga kompetisyon kagahapon, gipaambit ni Gullas ngadto sa mga atleta ang tulo ka mga mahinungdanong butang sa kinabuhi nga maoy nahimong solidong pundasyon pagtukod niya sa Gullas Cup. Kini mao ang dili paghikalimot sa ilang pagtuon, paglikay sa ginadiling bisyu labi na sa droga ug sa kanunay mag-ampo kay ang gahum niini makatul-id sa kinabuhi natong tanan. (BANAT NEWS)