DepEd-VII midayeg sa Naga city
CEBU, Philippines - Gidayeg sa Department of Education (DepEd) VII ang dakbayan sa Naga tungod sa malampuson nilang hosting sa 2016 Central Visayas Regional Athletic Association (CVIRAA) Meet.
Human sa closing ceremony sa maong multi-sporting event niadtong Biyernes, ang Naga City nakakuha og positibong komento sa ilang pag-host sa CVIRAA.
Gumikan niini, ang DepEd VII bukas karon sa ideya nga dad-on sa Naga City pagbalik ang CVIRAA sunod tuig uban usab sa posibilidad nga mo-host ang Naga sa Palarong Pambansa sa mga umaabot nga katuigan.
Si Naga City Mayor Val Chiong misaad nga ang ilang Olympic-size swimming pool andam na sunod tuig. Ang swimming event sa miaging CVIRAA didto gipahigayon sa Cebu City Sports Center.
Midugang si Chiong nga magpuno usab sila og beginners pool, usa ka football field ug covered courts sa kabarangayan sa Naga.
Sa iyang bahin, si DepEd-VII chief administrative officer Dr. Victor Yntig miingon nga ang Naga mamahimo na nga mohimo og ‘letter of intent’ aron ipadayag ilang interes nga mo-host sa CVIRAA o sa Palarong Pambansa.
Si DepEd Secretary Armin Luistro mihangyo nga angay nga mahibaw-an sayo pa lang daan ang mga mo-host sa Palarong Pambansa sa sunod nga tulo ngadto sa lima ka tuig.
Ang Palarong Pambansa mubalik sa Visayas sa 2018 Palarong Pambansa nga makahatag og kahigayonan sa Naga. (BANAT PALARO)
- Latest