Dobleng demalas
CEBU, Philippines - Dobleng demalas ang natagamtaman sa defending Commissioner’s Cup champion Talk ‘N Text Tropang Texters tungod kay gawas nga napilde sila sa Meralco Bolts, 88-84, gipahamtangan usab og ‘lifetime ban’ ang ilang import nga si Ivan Johnson.
Si Johnson gipahamtangan sa maong bug-at nga silot human niya balikasa si PBA Commissioner Chito Salud dihang gi-eject siya sa ikaduhang kuwarter dihang iyang gisiko ang nawong ni Meralco forward Bryan Faundo sa ilang duwa kagahapon didto sa PhilSports Arena.
Ang duwa kagahapon mao pa lang ang unang appearance ni Johnson sa conference human wala siya makaduwa sa opener dihang gisuspenso human manukmag og player atol sa usa ka pre-season game batok sa Blackwater Elite.
Si Johnson maoy ikaduhang PBA import nga gipahamtangan og ‘lifetime ban’ sa liga sunod ni Renaldo Balkman sa Petron niadtong 2013 human tuk-a ang iyang teammate nga si Arwind Santos.
Si Johnson gipamulta sab og P250,000 tungod sa gimugna niyang kagubot.
Ang pagkawala ni Johnson daku kaayo og epekto sa Tropang Texters sa ilang duwa kagahapon tungod kay nakapatuyang ang mga tirador sa Bolts nga gipangulohan ni Cliff Hodge, kinsa miiskor og 15 puntos, samtang ang import nga si Arinze Onuako mitampo’g 14 puntos ug milangkat siyam ka rebounds.
Ang Bolts misakmit sa sayong liderato sa ilang 2-0 win-loss record, samtang ang Texters adunay 1-1 nga baraha. (BANAT PALARO)
- Latest
