Lavine MVP sa NBA rising stars challenge
CEBU, Philippines - Ang point guard sa Minnesota Timberwolves nga si Zach LaVine miiskor og 30 puntos uban ang pito ka rebounds ug upat ka assists aron pangulohan ang Team USA ngadto sa kulbahinam nga kadaugan batok sa Team World, 157-154 sa NBA Rising Stars Challenge atol sa pagbukas sa All-Star weekend kagahapon didto sa Air Canada Center sa Toronto, Canada.
Sa gipakita niyang performance, si LaVine maoy napiling most valuable player.
Mao na kadto ang ikaduhang impresibong duwa ni LaVine sa Rising Stars Challenge tungod kay sa rookie pa siya sa miaging tuig, miiskor siya og 22 puntos ug upat ka rebounds.
Ang MVP sa miaging tuig mao ang iyang teammate sa Timberwolves nga si Andrew Wiggins. Si LaVine giisip nga usa ka dakung tabang sa kaugmaon sa Timberwolves diin nag-average siya og 12.8 points, 3.2 assists ug 2.6 rebounds karon nga season.
Si LaVine mopakita na sab og laing labok sa iyang pagdepensa sa titulo sa slam dunk contest karong adlawa.
Himuon sab karon ang 3-point shootout diin buot sab ni Stephen Curry sa Golden State Warriors nga depensahan ang iyang titulo.
Silang Kristaps Porzingis sa New York Knicks ug Emmanuel Mudiay sa Denver Nuggets parehong mibahog og 30 puntos aron pangulohan ang Team World.
Si Wiggins nga usa ka Canadian, miamot og 29 puntos, samtang si Mario Hezonja sa Orlando Magic adunay 19 puntos
Sila si Clint Capela sa Houston, Nikola Jokic sa Denver ug si Dwight Powell sa Dallas miamot og 12 puntos matag usa alang sa Team World.
Si LaVine mihimo'g lima ka dunks lakip niini ang kusog kaayong reverse two-hander.
Ang uban nga mga scorers sa Team USA naglakip nilang Jordan Clarkson sa Los Angeles Lakers sa iyang 25 puntos, Devin Booker sa Phoenix nga adunay 23 puntos ug ang teammate ni Clarkson sa Lakers nga si D’Angelo Russell nga midugang og 22 puntos.
Sa siyam ka players sa Team USA nga naka-iskor, bugtong si Marcus Smart lang sa Boston Celtics ang wala makaabot og double digits nga aduna la’y tres puntos.
Si Karl Anthony-Towns sa Timberwolves miposa’g 19 puntos, si Jahlil Okafor sa Philadephia mihimo’g 13 puntos, si Jabari Parker sa Milwaukee adunay 12 puntos ug si Rodney Hood sa Utah mitampo’g 11 puntos. (BANAT PALARO)
- Latest