Pacquiao miresbak

GENERAL SANTOS CITY, Philippines  – “'Wa ko’y labot sa huna-huna sa uban”.

Mao kini ang mubo apan hait nga mensahe ni Manny Pacquiao agi’g resbak ngadto sa iyang mga kritiko nga dili motuo sa plano niya nga moretiro na sa boksing.

Sa dihang eksklusibong nahinabi sa Banat News human siya mikulit og 40 puntos sa usa ka torneyo nga iyang giorganisar dinhi sa iyang mansion, si Pacquiao miinsister nga isab-it na niya sa hingpit ang iyang mga gloves human sa ikatulo niyang away batok ni Tim Bradley nga gikatakda karong Abril 9 didto sa MGM Grand sa Las Vegas.

Apan duha sa labing duol nga tawo nga konektado sa iyang karera ang dili motuo sa iyang pamahayag.  Sila si Top Rank chairman Bob Arum ug Hall of Fame trainer Freddie Roach nag-uyon nga ang ilang boksingero moaway pa human sa iyang sangka ni Bradley.

Dali silang gibaraw ni Pacquiao.

“Bahala sila kun unsa’y gusto nilang huna-hunaon basta ako mo-retire na human sa akong away ni Bradley”, matud pa sa eight-division world champion.

Mipadayag nang daan si Pacquiao nga moretiro na aron hatagan og igong pagtagad ang politikanhon niyang karera.

Ang kongresista sa   Sarangani Province midagan pagka-Senador sa bugnong lugaynon karong Mayo ug usa siya sa nag-unang mga contenders sa tanang kandidato sa mga survey.

Wa hinuon gisalikway ni Pacquiao ang posibilidad nga moaway pa siya og balik kun ugaling makahukom   nga moretiro.

“Kung retire na ka, puyde man mo-comeback di ba?”  nagkanayon ni Pacquiao.

Usa ka kasaligang tinubdan sa kampo ni Pacquiao nga dili gustong magpaila miingon nga hasta siya dili motuo nga moretiro na ang iyang agawon.

Apan sa iyang tan-aw bugtong makapabalik og away ni Pacquiao kun ugaling retirado na kini mao ang rematch batok ni Floyd Mayweather, Jr. (BANAT PALARO)