Cebu City midaog sa ilang ika-24 CVIRAA title

CEBU, Philippines - Nakadaginot pa gyud og duha ka daog ang Cebu City Niños kortesiya sa ilang basketball teams nga maoy mitak-op sa ilang kampanya   sa 2016 Central Visayas Regional Athletic Association (CVIRAA) Meet kagahapon didto sa  Doring Mendiola Sports field, Naga City.

Ang kadaugan maoy naghatag sa Niños sa ilang ika-24 nga overall championship ning tinuig nga multi-sports event.

Ang Cebu City elementary boys nga gibidahan sa University of San Carlos mipukan sa Cebu Province, 65-61 aron madaog ang gold, samtang   ang University of the Visayas nga nipresentar sa Cebu  midemolis sa Bohol, 106-62,  sa secondary boys.

Sa overall standing, ang Niños mihipos og 113 gold, 71   silvers ug 59 bronze medals. Nagsunod nila ang  Mandaue City nga adunay 47 golds, 42 silvers ug 47 bronzes, samtang ang Bohol nahimutang sa ikatulo sa ilang 31 golds, 40  silvers ug 65  bronzes. Ang fourth ngadto sa 13th placers  mao ang  Cebu Province, Lapu-Lapu City, Talisay City, Danao City, Tagbilaran City, Naga, Siquijor, Carcar, Toledo ug Bogo. Ang CVIRAA Meet magsilbeng qualifying tournament alang sa koponan sa Region VII nga moduwa sa 2016 Palarong Pambansa sa Abril didto sa Legazpi, Albay. (BANAT PALARO)