Moralde, Sabalde mag-ilog sa WBF title karon
GENERAL SANTOS CITY, Philippines - Gubat dili gugma maoy mopatigbabaw karong bisperas sa adlaw sa mga kasingkasing gumikan kay ang wa’y pildeng si John Vincent ‘Mulawin’ Moralde sa Sanman Boxing Club makigsinukmagay man sa Sugbuanong si Anthony ‘Zorro’ Sabalde sa Noy Pacing Flores Stable alang sa bakanteng WBF International featherweight title karong adlawa dinhi sa Gaisano Mall of GenSan Atrium.
“This is our pre-Valentine’s celebration for all the boxing fans here. Looking forward to an exciting and enjoyable fights ahead”, matud pa ni Sanman Promotions CEO Jim Claude ‘JC’ Mananguil, ang promoter sa maong card.
Wa’y pilde sa 14 ka away uban ang 7KOs, ang 21-anyos nga si Moralde gikinahanglan nga modaog aron dili madiskaril ang maanindot nga oportunidad nga nagpaabot kaniya sa unahan.
Kini kay kun siya modaog, si Manangquil nagplano nga ipadala siya sa Amerika aron mag-train uban sa iyang stablemate nga si Harmonito de la Torre nga tua na karon magbase sa Miami, Florida.
Dugang ni Manangquil nga apil sa ilang giambisyonan sa umaabot mao nga makasangka si Moralde bisan asa nilang WBO featherweight champion Vasyl ‘Hi-Tech’ Lomachenko o WBA titlist Leo ‘El Terremoto’ Santa Cruz.
“Masaligon kaayo ko nga modaog aning away. Kompiyansa sab kaayo ko nga mahimo kong world champion sa dili madugay”, dason pa ni Moralde, nga mao sab ang kasamtangang WBC Asian Boxing Council Continental 126-pound champion.
Apan si Moralde mangandam alang sa usa ka dakung gubat batok ni Sabalde, nga misaad nang daan nga ipabuhagay kutob sa iyang mahimo aron molampus.
“Mianhi ko dinhi aron modaog. Mao na ang naa sa akoang huna-huna ug wala nay lain pa”, matud ni Sabalde nga nagbitbit og baraha nga 10-4 uban ang 5KOs.
Sa main supporting bout, mag-ilog sa Philippine Boxing Federation (PBF) super featherweight title ang laing wa’y pildeng batos sa Sanman nga si Romero ‘Ruthless’ Duno ug ang Negrense nga si Jason Egera lumad gikan sa Siaton.
Samtang si PBF minimumweight champion Ronnie ‘Ultimate Warrior’ Tanallon (8-2-1, 2KOs) sa Sanman manalipod sa iyang bakus batok ni Rodel Tejares (20-36-6) sa Manila. (BANAT PALARO)
- Latest
