Duha ka Cebuano boxers moataki sa GenSan
CEBU, Philippines - Duha ka Sugbuanong boksidor ang naapil sa walo ka kulbahinam nga mga away ang masaksihan sa “Brawl at The Mall: Glory” karong Sabado sugod sa alas 2 sa hapon didto sa Gaisano Mall Atrium sa General Santos City.
“This is our pre-Valentine’s Day celebration for all the boxing fans,” matud pa ni promoter Jim Claude ‘JC’ Manangquil, ang Chief Executive Officer sa Sanman Promotions.
Mosalida sa main event ang Sugbuanong si Anthony ‘Zorro’ Sabalde sa Noy Pacing Flores Stable nga makigsangka sa wa’y pildeng si John Vincent ‘Mulawin’ Moralde sa Davao alang sa World Boxing Federation (WBF) International featherweight title.
Ang kababayan ni Sabalde nga si Bryan Samson magsagubang sab og malisud nga hagit batok sa laing pambato sa Sanman nga si Reymart Gaballo.
Sa main supporting bout, mag-ilog sa Philippine Boxing Federation (PBF) super featherweight title ang wa’y pildeng batos sa Sanman nga si Romero ‘Ruthless’ Duno ug ang Negrense nga si Jason Egera lumad gikan sa Siaton.
Samtang si PBF minimumweight champion Ronnie ‘Ultimate Warrior’ Tanallon (8-2-1, 2KOs) sa Sanman manalipod sa iyang bakus batok ni Rodel Tejares (20-36-6) sa Manila. (BANAT PALARO)
- Latest