USJ-R Jaguars kampiyon sa 1st Raul Cabanero cup
CEBU, Philippines - Wala na motugot pa ang USJ-R Jaguars nga mapilde pag-usab sa UV Green Lancers dihang miiskor sila og kulbahinam nga kadaugan, 90-80 sa knockout finals aron paglangkat sa korona sa 1st Capt. Raul Cabanero Inter-collegiate basketball tournament niadtong Miyerkules didto sa Bulacao Sports Complex, Talisay City.
Si Kevin Rey Villafranca maoy mibida sa kadaugan sa USJ-R nga nakakabig sa organizers pagpili kaniya isip MVP. Si Villafranca mikamada og 28 puntos uban ang walo ka rebounds ug duha ka blocks.
Wala sab kapugngi si Miguel Gastador nga miratsada og 15 puntos lakip ang iyang krusyal nga 3-pointer nga nakapalabaw og balik sa Jaguars, 79-77 sa katapusang 4:11 sa fourth quarter ug sukad niadto wala na kini molingi pa.
Naglisud ang USJ-R pagsugod sa duwa nga miresulta sa ilang pagkalubong, 12-25 paghuman sa first quarter. Apan bisan og gilubong, mikayod gihapon ang Jaguars aron makan-an ang labaw. Ang Jaguars mikalingaw og kitkit sa labaw atol sa third period ug samtang nagkagamay ang oras, nagkahilis sab ang labaw sa Lancers, 53-52 sa nahabiling 5:02 sa maong kuwarter.
Nahimong kulbahinam ang duwa dihang nagsinukliay og mga puntos ang duha ka koponan hangtod natukob sa Jaguars ang daog.
Laing mipakita og maayong labok sa USJ-R mao si Ralph Jude Dinolan, kinsa mitikdol og 11 puntos.
Ang napildeng UV gipangulohan ni Michael Angelo Macion pinaagi sa iyang 21 puntos, gisundan ni Leonard Santillan nga adunay 14 puntos, samtang sila si Jun Kent Manzo III ug Joshue Segumpan Jr. mitimbre’g 12 puntos matag usa.
Gawas sa tropeyo, ang Jaguars nakadawat sab og P50,000 nga ganting salapi bugti sa ilang pagdaog sa kampiyonato, samtang ang Green Lancers mibitbit og P30,000.
Ang liga nga usa sa mga highlights sa kapistahan sa ilang mahal nga patron Sr. Sto. Niño karong Domingo, nagmalampuson ubos sa superbisyon ni Bulacao Brgy. Capt. Raul Cabanero, kinsa mao sab ang ABC president sa Talisay City, inabagan nilang konsehal Banjo Abastillas, Darwin Cabanero ug Agnes Lastimosa ug ingon man sa Bulacao Barangay Council ug sa SK Task Force.
Ang mga duwa gidumala ni CESAFI senior referee Edwin Dejacto Sr. uban nilang Elmer Asignar ug Al Reley ug ingon man usab nilang Jay-R Dalumpines, Tata Cabigas ug Brando Alcantara. (BANAT PALARO)
- Latest
