Mga banggiitang import magtigi karon
CEBU, Philippines - Magkuros ang dalan sa duha ka veteran ug elite import dihang magharong ang crowd darling Barangay Ginebra San Miguel ug NLEX Road Warriors karong gabii sa PBA Commissioner’s Cup.
Ang Ginebra makigsangka sa NLEX sa main game sa alas-7 sa gabii, human sa duwa tali sa GlobalPort Batang Pier ug Mahindra Enforcers sa alas-4:15 sa hapon.
Ang Ginebra nga tinguhang mamawi human sila mapakyas pagsulod sa finals sa miaging conference bidahan ni ex-NBA player Othyus Jeffers, samtang atbangan siya sa laing ex-NBA cager nga si Al Thornton nga mobalik isip import sa NLEX.
Si Ginebra coach Tim Cone mipasabot nga bisan pa og 6-foot-5 lang ang height sa ilang import, haum kini sa koponan tungod kay matabangan kini sa ilang ‘twin towers’ nga sila si Greg Slaughter ug Japeth Aguilar.
Human mapakyas pagsulod sa semifinals sa miaging conference, ang Ginebra gusto nga mopakita nga gutom sila sa usa ka finals appearance nga dugay na nilang natagamtaman.
Apan may dautang tinguha ang NLEX nga gusto molihi og pilde sa Ginebra. Si Thornton nasuwayan na sa NLEX sa miaging tuig ug tinguha niya nga mamawi pinaagi sa paghatod na sa Road Warriors sa kalampusan.
Moabag ni Thornton ang veteran star center nga si Asi Taulava uban nila ni Sean Anthony ug Marc Cardona. (BANAT PALARO)
- Latest
