Sparmates ni Pacquiao pulos walay pilde
CEBU, Philippines - Gikuha ni Hall of Fame trainer Freddie Roach ang serbisyo sa usa ka wa’y pildeng welterweight contender aron himuong sparring partner sa iyang batos nga si Manny Pacquiao.
Basi sa taho ni Eddie Aliena sa philboxing.com, si Roach nagkanayon nga si Frankie Gomez molupad dayon sa Pilipinas sa higayon nga makompleto na ang tanan niyang travel papers aron tabangan si Pacquiao sa preparasyon niini alang sa ikatulo niyang sangka batok ni Tim Bradley karong Abril 9 sa MGM Grand sa Las Vegas.
Si Roach gikatakda nga moabot sa nasud karong weekend aron personal nga mogiya sa training camp ni Pacquiao didto sa General Santos City.
Ang 24-anyos nga si Gomez, lumad gikan sa East Los Angeles, California, nagbitbit og baraha nga 20-0 ug 13 sa iyang mga biktima pulos gipakamang. Sukad siya nahimong pro niadtong tuig 2010, si Roach mao na’y nagbaid sa iyang abilidad. Gawas ni Gomez, nagplano sab si Roach nga dad-on sa GenSan si super lightweight Jose Ramirez aron maka-sparring ni Pacquiao. Si Ramirez wala pa sab makatilaw og pilde sa 16 ka away diin 12 sa iyang mga daog pinaagi sa knockout. (BANAT PALARO)
- Latest
