USC mipuwesto sa ikatulo sa 1st Raul Cabanero Cup
CEBU, Philippines - Nangayo pa og dugang singko minutos nga lugway ang USC Warriors una nila matumba ang J. Espina Wildcats, 115-106 aron maangkon ang third place trophy sa 1st Capt. Raul Cabanero Inter-collegiate basketball tournament niadtong Martes sa gabii didto sa Bulacao Sports Complex, dakbayan sa Talisay.
Si Ian Jefferson mipabuto’g 38 puntos aron pangulohan ang USC, samtang si Joshua dela Cerna milansang sa ikaduha niyang sunod-sunod nga 42 puntos aron sab pangulohan ang napildeng J. Espina.
Sayo unta nga makuha sa USC ang daog human sila moabante og dos puntos, 96-94 sa daginutong segundos sa fourth quarter, apan ang J. Espina nakatabla human sa lay-up ni Joerio Mumar nga nakapugos sa duwa ngadto sa overtime.
Sa tuyo nga maangkon ang daog, ang USC milusad dayon og 9-0 run pagsugod sa overtime sa tulo ka sunod-sunod nga 3-pointers ni Tagapan nga nakapaluya sa J. Espina. Misamot ang kalbaryo sa J. Espina human ma-fouled out si Dela Cerna sa nahabiling dos minutos sa overtime.
Sa pasiunang duwa, ang Holy Child nakaeskapo sab bitbit ang 74-73 nga kadaugan batok sa team Hawod sa Inter-sitio division ning maong torneyo nga namugna pinaagi sa mga paningkamot ni Bulacao Brgy. Capt. ug Talisay City ABC president Raul Cabanero, inabagan sa iyang mga konsehales nga silang Banjo Abastillas, Darwin Cabanero ug Agnes Lastimosa ug ingon man sa Bulacao Barangay Council ug SK Task Force.
Puntos matag usa
Unang duwa:
HOLY CHILD (74) – Echavez 17, Brigoli 16, Rabadon 16, Ando 2, Bacasmas 2.
HAWOD (73) – Abalo 21, Daan 10, Cabriana 9, Unabia 9, Anto 9, Baguio 7. Boiser 2, Pacible 2, Quinaging 2, Ganados 2.
Ikaduhang duwa:
USC (115) – Tagapan 38, Ortega 22, McAloney 20, Pepito 17, Suarez 11, Rabat 3, Divinagracia 2.
J. ESPINA (106) – Dela Cerna 42, Lucena 20, Sanchez 12, Pono 12, Bucao 6, Rossel 5, Mumar 4, Kong 3, Maglasang 2. (BANAT NEWS)
- Latest
