USJ-R vs. UV SA 1st Raul Cabanero Cup Finals
CEBU, Philippines - Nakalabang sa lawod sa kalisdanan ang USJ-R Jaguars human nila gilayog ang J. Espina Wildcats, 100-97 sa overtime sa semifinals sa 1st Capt. Raul Cabanero Inter-collegiate basketball tournament sa miaging gabii didto sa Bulacao Sports Complex, Talisay City.
Gumikan niini, ang USJ-R maoy nakaangkon og katungod aron makigharong sa UV Green Lancers sa ‘knock-out’ finals karong alas-8 sa gabii.
Nag-ung-ong na unta sa kadaugan ang J. Espina dihang naglabaw sila sa katapusang tres segundos sa regulasyon, 84-81, apan nakaigwalis ang USJ-R human mipataroy sa iyang 3-point shot si Rick Dyn Peromingan hinungdan sa overtime.
Sa dugang singko minutos, nagpuli-puli’g labaw ang duha ka koponan hangtod nga nakubit sa Jaguars ang daog.
Si Kevin Villafranca maoy topscorer sa USJ-R nga mitusik og 25 puntos, samtang si Peromingan adunay 17 puntos. Laing tulo nila ka teammates ang miiskor sab og double figures. Si Ralph Dinolan mitikdol og 15 puntos, gisundan ni Nelvin Navarra nga mitimang og 14 puntos ug ni Jaybie Mantilla nga mitimbre’g 11 puntos.
Nakawang ang 42 puntos ni Joshua Dela Cerna gumikan kay pakyas ang J. Espina pag-abante sa finals ning maong torneyo nga gipasiugdahan ni Bulacao Brgy. Capt. ug Talisay City ABC president Raul Cabanero inabagan sa iyang mga konsehales nga silang Banjo Abastillas, Darwin Cabanero ug Agnes Lastimosa ug ingon man sa Bulacao Barangay Council ug sa SK Task Force.
Sa laing duwa, ang sitio San Vicente nakaipsot sa kulbahinam nga duwa batok sa Crossan, 79-77 ubos sa Inter-sitio division.
Ang mga duwa gipadagan sa Cebu Referee Basketball Association (CEBRA) sa pagpangulo ni Edwin Dejacto Sr.
Puntos matag usa
Unang duwa:
SAN VICENTE (79) – T. Ababon 18, Romarez 14, Tabasa 10, Matahom 10, Cabansag 10, Bacus 6, Parba 6, Ababon 5.
CROSSAN (77) – B. Alcantara 18, Yusores 16, Montebon 16, Villamor 10, Alcantara 9, Pelayo 8.
Ikaduhang duwa:
USJ-R (100) – Villafranca 25, Peromingan 17, Dinolan 15, Navarra 14, Mantilla 11, Hangingan 6, Trangia 6, Bayhonan 3, Cuestas 3.
J. ESPINA (97) – Dela Cerna 42, Dumar 12, Aloro 10, Sanchez 9, Lucena 9, Pono 8, Rossel 7. (BANAT NEWS)
- Latest