Bohol nag-una gihapon, Niños misalida sa swimming
CEBU, Philippines - Miarangkada sa swimming event ang Cebu City Niños, apan pabilin gihapong nag-una sa liderato ang Bohol Province kay mas daghan ang medalya niining nahakot sa athletics human sa duha ka adlaw nga aksiyon sa 2016 Central Visayas Regional Athletic Association (CVIRAA) Meet kagahapon didto sa dakbayan sa Naga.
Ang duha ka dibisyon parehong adunay walo ka gold medals, apan ang Bohol maoy naglabaw kay mihakot man sab kini og walo ka silver ug 10 ka bronze medals, samtang ang Cebu City duna lama’y pito ka silver ug pito ka bronze.
Miangkon og dugang bulawan ang Bohol gumikan nilang Bryl Brian Torreon (41.20m) ug Jinky Lansang (31.62m) sa javelin throw ug Ray Socajel sa 3,000m steeplechase sud sa oras nga 10 minutos ug 55.34 segundos.
Samtang ang Niños misakmit og gold sa elementary girls high jump gikan ni Crystal Villanueva sa distansiya nga 1.4 metros.
Sa swimming nga giduwa sa Cebu City Sports Center, mibulhot ang Niños kortesiya nilang Jehaosh Garrido ug Christante Veloso sa 100m backstroke ug Lyh Ann Navarro sa 200m butterfly. Nakasawom sab og tulo ka golds ang Niños sa relay events.
Wala hinuon mapakyaw sa Cebu City ang gold sa relay gumikan kay ang Tagbilaran City mao man ang midaog sa secondary girls 200m medley relay. Ang Tagbilaran nakakuha og gold gikan ni Zoe Austral sa 50m butterfly.
Wala sab magpabitin si Raven Faith Alcoseba sa dakbayan sa Talisay. Ang giilang Palaro 'Golden Girl' mikabkab og duha ka bulawan sa 400m freestyle sa oras nga 4:53.15 ug sa 100m backstroke sa oras nga 1:10.31. (BANAT NEWS)
- Latest
