Uytengsu pasidunggan sa PSA
CEBU, Philippines - Bisan pa sa kaparotan sa Alaska Aces sa miaging PBA All-Filipino Cup finals, ang chief executive president sa Alaska Milk Corporation nga si Wilfred Uytengsu Jr. mao gihapon ang modawat sa prestihiyosong ‘Executive of the Year’ award gikan sa Philippine Sportswriters Association (PSA) sa ipahigayong awards night sa Pebrero 13 didto sa kaulohan.
Si Uytengsu kansang kaliwat taga-Sugbo, pasidunggan dili lang sa iyang pagdala sa usa ka PBA team, apan lakip na usab sa iyang kontribusyon sa kalamboan sa ubang natad sa paugnat sa kusog sama sa triathlon ug football.
“It’s with great honor and pride for the PSA to pay tribute to a true sportsman in Mr. Wilfred
Uytengsu Jr., by bestowing upon him the Executive of the Year. The country’s sportswriting community couldn’t think of any better person of integrity deserving of the award than him,” matud pa ni PSA president Riera Mallari sa The Philippine STAR, ang igsuong mantalaan sa Banat News.
Mga una nang nidawat sa maong award naglakip nila ni Manny V. Pangilinan, Hans Sy, Ricky Vargas, Dan Palami ug Chito Salud.
Sa wala pa siya mahimong usa ka sports patron, si Uytengsu usa usab ka former national athlete diin nirepresentar siya sa nasud sa miaging 1981 Southeast Asian Games.
Sa pagdala niya sa Alaska Milk Corp. gikan sa iyang amahan nga si Wilfred Sr., didto mas gipalig-on sa batan-ong Uytengsu ang mga programa sa paugnat sa kusog sa kompaniya.
Gawas sa ilang PBA franchise, ang Alaska Milk Corp. usab ang mipasiugda sa nabantog nga Ironman triathlon ug mipahigayon usab sila og mga Alaska Football Power camps sa nagkadaiyang dapit sa nasud. (BANAT PALARO)
- Latest