Santos misud-ong kadaUgan sa Beermen 'Labing lisud, apan labing tam-is'

CEBU, Philippines - Sa tibuok niyang karera isip basketbolista, daghan na og natilawan nga kampiyonato si PBA superstar Arwind Santos sa San Miguel Beermen, apan giisip niyang ‘labing lisud, apan labing tam-is' ang kadaugan nga natagamtaman nilang kalampusan batok sa Alaska Aces sa bag-ohay pang natapos nga PBA Philippine Cup.

Sa miaging semana, ang Beermen mipakaging sa Aces sa Game-7, 96-89 aron pagkulit og kasaysayan isip labing unang koponan sa PBA nga nakabangon human mahisugamak sa 0-3 nga alkansi sa serye dayon na ngadto sa pagdaog og titulo.

“Eto yung pinakamahirap, pero pinakamasarap sa lahat ng mga championship na naranasan ko,” matud pa ni Santos sa dihang ekslusibong nahinabi sa Banat News niadtong Domingo sa gabii didto sa Marco Polo Plaza Hotel. “Sino ba naman ang mag-aakala na mag-champion pa kami matapos talunin kami nang tatlong sunod-sunod ng Alaska at hindi namin alam kung makapaglaro pa ba ulit si JuneMar (Fajardo)”.

Human sila gisagunsonan og tulo ka pilde sa Alaska, giangkon ni Santos nga naminghoy gyud silang tanan ug ubos kaayo ang kompiyansa nila sa ilang kaugalingon. Padung sa Game-4, hilom ug wa’y gusto mosulti bisa’g usa kanila sud sa ilang locker room, apan ilang giangkon nga hugot kaayo silang nag-ampo nga makadaog bisan usa lamang ka higayon.

Tuod man miabli ang panganod sa kalangitan ug nabuligan sila og gasa human ilang gipukan ang Aces sud sa overtime, 110-104, aron pagpabiling buhi bisan tuod og biya gihapon   sa serye.

“Nung naka-isa kami, ang saya-saya namin na parang nag-champion na rin kami. Pero nasa isipan namin, try ulit kami na manalo pa nang isa,” dason pa ni  ‘Spiderman’ nga lumad gikan sa Pampanga.

Sa dihang niabot ang Game-5, si Santos ug mga kaubanan nasurprisa og maayo sa dihang gipasud ni coach Leo Austria si Fajardo sa ikaduhang kuwarter ug maayo dayong labok ang giwadwad niini pinaagi sa pagpasud sa una niyang itsa. Alang ni Santos, timaan kadto sa mas nindot pang mahitabo kanila sa umaabot.

Uban ni Fajardo, ang Beermen mipakaging sa Aces sa ikaduhang sunod-sunod nga higayon sa overtime, 86-73. Ang Sugbuanong superstar milansang og 13 puntos sud sa 16 minutos ug 28 segundos sa labing una niyang paglugwa sa Finals atol sa Game-5.

Nadasig sa presensiya ni Fajardo, ang Beermen mibuntog na sab sa Aces, 100-89, aron pagpuwersa og Game-7.

Sa katapusan, ang kasaysayan midapig sa Beermen. Nakasugakod sila sa madasigon nga pakigbisog sa Aces dayon na ngadto sa pagposte og 96-89 nga kadaugan aron pagmugna og rekord sa liga kay sukad-masukad wala pa may team nga nabanhaw human gilubong og 0-3 sa usa ka best-of-seven finals series.

“Napakasarap na panalo kasi legacy na namin 'to eh. Part na kami ng history 'ika nga. Naging posible sa amin ang imposible dahil hindi matatawaran ang puso at tiwala namin sa isa’t-isa. Napakahirap ng aming ginawa na sa tingin ko, kung uulitin man ito ng isang daan na beses, seguro hindi na magagawa ulit namin,” dugang pa ni Santos. (BANAT PALARO)