Fajardo wa una miapil sa ensayo
CEBU, Philippines - Gihatagan una og panahon ni San Miguel Beermen coach Leo Austria ang iyang franchise player nga si June Mar Fajardo nga makapahuway rasun nga wala una kini gipaapil sa unang team practice sa koponan isip pangandam sa PBA Commissioner's Cup sunod semana.
Ang Beermen mibalik na sa ensayo uban sa ilang import nga si Tyler Wilkerson pipila ka adlaw human nila mabuhat ang makasaysayanong kampiyonato sa All-Filipino Cup batok sa Alaska Aces.
Hinuon si Austria miingon nga makaduwa ang 6-foot-10 nga si Fajardo atol sa ilang opener batok sa Mahindra Enforcers sa Pebrero 20 didto sa Big Dome. "We start training gradually. Pakonti-konti lang. June Mar will do the same as he joins us a week later,” matud pa niya sa The Philippine STAR.
Ang Beermen tinguha nga musakmit sa Commissioner's Cup title aron makompleto ang usa ka talagsaong grandslam title.
Hinuon, maisip nga lisud ang ilang tinguha tungod kay nagpalig-on na usab ang ubang koponan sa maong reinforcement conference.
Ang defending champion nga Talk 'N Text Tropang Texters usa sa mga contenders uban sa San Miguel tungod sa presensya sa ilang mibalik nga import ug ex-NBA forward nga si Ivan Johnson.
Gawas sa SMB ug TNT, mga gitan-aw nga contender mao ang Alaska Aces, Rain or Shine Elasto Painters, Barangay Ginebra San Miguel ug GlobalPort Batang Pier. (BANAT PALARO)
- Latest
