Ciriaco ‘Cacoy’ Cañete mipanaw na
CEBU, Philippines - Ang gitahod nga Supreme Grandmaster Ciriaco ‘Cacoy’ Cañete, kinsa maoy nagtukod sa nabantog na kaayo sa tibuok kalibotan nga Doce Pares Club niadtong 1932, mipanaw na niadtong Biyernes sa gabii.
Nag-edad siya og 96 anyos.
Si Cacoy maoy nakapabantog sa eskrima o arnis, usa ka indeginous Filipino martial art sa tibuok kalibotan.
Sa wala pa siya mamatay, ang 12th degree black belter nga si Cacoy na-admit sa hospital sa makaduha ka higayon sukad niadtong Enero 9 diin ang Doce Pares nagsaulog sa ilang 84th founding anniversary.
Mao kini ang hinungdan nganong wala siya katambong sa induction ug oathtaking ceremony sa bag-ong napili nga mga opisyales sa Cacoy Doce Pares World Eskrima Federation didto sa ilang headquarters sa dalan C. Padilla, dakbayan sa Sugbo.
Si Cacoy nga lumad taga San Fernando, Cebu, nahimong lifetime president sa Doce Pares human namatay ang iyang igsuon nga si Eulogio ‘Yoling’ Cañete, ang orihinal nga founder sa club niadtong 1988.
Giila siya sa iyang mga tinun-an isip mentor, older brother ug comedian, si Cacoy nilibot na sa tibuok kalibotan gikan sa Australia ngadto sa Europe ug sa dagkung mga siyudad sa Estados Unidos aron pagsabwag sa pulong nga ‘eskrima’ ubos sa banner sa Doce Pares, ang labing karaan nga martial arts organization.
Si Cacoy nakahimo sab og lima ka libro nga naglakip sa ‘Basic Doce Pares Eskrima’ niadtong 1988, ‘Pangamot’ (Bare-handed Defense System) sa 2002, ‘Eskrido (Eskrima, Jujitsu & Judo Integrated) sa 2004, ‘Eskrima-Arnis Techniques’ niadtong 2009 ug ang ‘Olisi-Baraw’ sa 2014.
Si Cacoy nagbilin og pito ka anak nga sila si Alex, Bernadette, Catherine, Dennis, Edgar, Faye ug Glenn nga pulos sab eksperto sa eskrima.
Ang iyang apo nga si Chuck Cañete, ang kasamtangang Vice President for Operations sa Cacoy Doce Pares, nagkupot og ranggo nga Grandmaster.
Ang haya ni Cacoy anaa sa St. Peter’s Chapel sa Imus. Ang lubong ipahibalo ra unya. (BANAT PALARO)
- Latest