Back-to-back sa Lakers

CEBU, Philippines - Mihimo og krusyal  nga mga  puntos ang Hall of Fame guard nga si  Kobe Bryant  sa hinapos nga bahin sa fourth quarter  alang sa Los Angeles Lakers nga nakaipsot batok sa New Orleans Pelicans, 99-96 sa nagpadayong duwa sa National Basketball Association kagahapon didto sa New Orleans.

Ang pinakadakung basket iyang nahimo sa katapusang 58 segundos human siya makapasulod og three-pointer gikan sa tuong bahin sa ilang korte aron molabaw ang Lakers sa iskor, 98-92. 

Kini ang ikaduhang daog sa Lakers batok sa Pelicans karon nga season.  

Wala mosulod ang three-point attempt ni Jrue Holiday nga mohatod unta sa duwa ngadto sa overtime. Ang Pelicans misikit sa katapusang higayon sa iskor nga 96-98 human sa duha ka free throws ni Bryce Dejean-Jones sa nahabiling 21 segundos.

Si Anthony Davis mihimo sa iyang ikasiyam nga 30-plus game karon nga season aron pangulohan ang Pelicans sa iyang 39 puntos nga maoy iyang ikaduhang labing daku nga iskor karon nga season.  Nakaiskor siya og  43 puntos sa ilang pagpanulong sa Atlanta  Hawks niadtong Nobiyembre 6 aron tablahon ang iyang career. 

Si Davis mihimo sab og 11 ka rebounds, apan bisan og maayo ang iyang field goal nga 16-of-15, wala siya mangigo sa free throw nga adunay 7 of 12.

Sa iyang ika-10 ka adlaw nga kontrata, ang guard nga si Dejean-Jones mitala og career-high 17 puntos, walo niini didto sa fourth quarter.  Ang Pelicans naka-outscore sa Lakers, 27-20 sa first period, apan ang iyang natampo nga naglakip sa siyam ka rebounds ug duha ka steals, dili pa igo aron modaog ang iyang koponan.  

Mao kadto ang unang back-to-back nga kadaugan sa Lakers karon nga season human sila modaog batok sa Minnesota Timberwolves, 119-115 niadtong Pebrero 3.

Sa laing mga duwa,  ang Houston Rockets midaog batok sa Phoenix Suns sa iskor nga 111-105, mao sab ang Detroit Pistons nga midaog batok sa New York Knicks, 111-105.  

Midaog sab ang Toronto Raptors batok sa Portland TrailBlazers, 110-103.  (BANAT PALARO)