Horizons autoparts hari sa 1st bond of masters caging
CEBU, Philippines - Sama sa naglagiting nga kainit sa haring adlaw, nanginit usab si Marianito ‘Master’ Tan alang sa Horizons Autoparts nga mipukan sa Gold Farm, 80-70 aron pagsakmit sa kampiyonato sa 1st Bond of Masters basketball tournament niadtong Domingo didto sa Vista Grande gym.
Si Master miposa’g tulo ka three-pointers sa kinatibuk-an niyang 16 puntos aron pangulohan ang balanseng opensa sa Horizons Autoparts.
Mitimbre sab og 10 puntos si Victor Pacquiao alang sa Horizons Autoparts nga maoy nidominar sa tibuok duwa.
Duha sab ka players sa Gold Farm ang miiskor og double figures pinangulohan ni Jack Jakosalem nga miani og 19 puntos, samtang si Marvin Muñoz mipupo’g 14 puntos.
Sa sayo pa, ang Stickworld mipilde sa MJE, 76-72 aron mopahiluna sa ikatulong puwesto.
Gipangulohan ni Edison Sabellano ang kadaugan pinaagi sa iyang 18 puntos, sila si Along Cañete ug Lloyd Sabellano mitampo’g 14 ug 11 puntos.
Si Virgil Domai mao sab ang nangu sa MJE sa iyang 20 puntos, lakip ang unom ka three-pointers. Gisundan ni Glenn Gocela sa iyang 18 puntos ug Dindin Jayme nga adunay 11 puntos.
Si Galen Gabiana maoy season MVP, samtang si Master Die Hard mao sab ang napiling Finals MVP ning bag-ong naporma nga Bond of Masters Club ubos sa liderato ni Marianito ‘Master’ Tan isip presidente.
Lain pang mga opisyales sa Bond of Masters naglakip nilang Edsel Flores (vice president), Dulf Antolijao (treasurer), Niel Nadela ug Danilo Tariga (secretaries). Sila si Along Cañete ug Manolite Aves maoy ilang artists. (BANAT PALARO)
- Latest
