Solong liderato tuyo sa Beermen

CEBU, Philippines - Tinguhaon sa San Miguel Beermen nga makuha ang krusyal nga daog sa ilang pakigbatok sa Mahindra Enforcers  sa PBA Philipine Cup karong adlawa didto sa Smart Araneta Coliseum.

Sugdan ang ilang duwa sa alas-7 sa gabii, human sa duwa tali sa GlobalPort Batang Pier ug NLEX Road Warriors.

Ang kadaugan sa Beermen  motukmod kanila alang sa solong liderato sa standing.

Ang Beermen kasamtangan nga nakigtabla sa Alaska Aces ug Rain or Shine sa managsamang 6-1 win-loss records. Kun modaog ang Beermen daku sab ang ilang tsansa nga makakuha og automatic slot sa semis. .

Bisan pa og sila ang inilog ilabi na sa presensiya ni reigning MVP  Junemar Fajardo, ang Beermen dili mokompiyansa sa Enforcers nga mipilde kanila atol sa duha ka regular games sa miaging Commissioner’s ug Governor’s Cup.

Sa ilang bahin, ang Mahindra (2-5) maninguha sab nga modaog aron mahayagan  ilang dalan nga makasulod sa playoffs sa labing unang higayon sa ilang franchise.

Ang Mahindra mosandig sa mga veteran nga sila si KG Canaleta ug Cebuano forward Aldrich Ramos. (BANAT NEWS)