Top V third sa laba President’s cup 2015
CEBU, Philippines - Ang Top V nagsalig sa maayong performance sa ilang sentro nga si Dodoy Rizane aron modaog batok sa Monterroyo, 75-66 sa sangka nila alang sa ikatulong puwesto sa second conference sa LABA President’s Cup 2015 basketball tournament niadtong Lunes didto sa Banilad Sports Center, dakbayan sa Mandaue.
Si Rizane mihimo’g double-double pinaagi sa iyang 22 puntos ug 10 ka rebounds aron pangulohan ang Top V nga wala na molingi pa human molabaw, 7-6 sa sayong bahin sa first period.
Mipakita sab og maayong labok sa Triple V si Arnel Colanse, kinsa mitampo’g 14 puntos ug silang Geryl Bukiron ug Leo Gelbolingo nga adunay 12 puntos matag usa.
Misikit unta ang Monterroyo sa halftime, 36-37 gikan sa 11 puntos nga biya, apan miburot pagbalik ang labaw sa Triple V, 59-48 sa hinapos nga bahin sa third quarter. Nakan-an pag-usab ang labaw ngadto na lang sa unom human sa lima ka sunod-sunod nga puntos ni Dr. Raul Monterroyo, 63-69 sa nahabiling 2:19 sa duwa, apan nagyagaw ang ilang duwa hinungdan sa ilang kapildihan. Si Tawing Grafe mikadlit og 19 puntos aron mangu sa Monterroyo, gisundan ni Lindsay Bontilao nga adunay 13 puntos, samtang ang team owner nga si Monterroyo mihipos og siyete puntos.
Sa pasiunang duwa, ang Los Amigos Basketball Association (LABA) Legends milubong sa LABA Officials, 85-69 sa usa ka exhibition game.
Si Montoy Singson maoy nangu sa Legends nga miburak og 26 puntos. Maayo sab nga nakaduwa si Merot Ygoña diin mitikdol kini’g 16 puntos, samtang si Arnold Pestaño mitimbre’g 13 puntos.
Ang LABA Officials gipangulohan sab nilang Richard Jordan ug Joel Cabahug sa ilang 15 ug 10 puntos.
Ang mga duwa gipadagan ni league commissioner Geryl Bukiron sa abag nilang Adie Cinco, Lloyd Chavez, Allan Recla ug ingon man nilang Chang Tejero, Chigie Gesulga, Henry Fontanoza ug Arman Gonzaga. (BANAT PALARO)
- Latest
