Avengers daog gyud sa Luigi

CEBU, Philippines – Midaog gyud ang Avengers batok sa Luigi-Sebandal, 59-57 sa kulbahinam nilang duwa sa Second Conference sa LABA President’s Cup 2015 basketball tournament niadtong Biyernes sa gabii didto sa Barangay Banilad Sports Center, Mandaue City.

Ang Luigi-Sebandal labaw  og dos puntos  sa first period, 14-12, apan nainat  ngadto sa otso puntos human sa pito ka sunod-sunod nga puntos ni LABA president Gilbert Sebandal, 23-15 sa second quarter. Ang Luigi-Sebandal mitala sa labing daku nilang labaw nga 14 puntos, 35-21 sa wala pa sila mikolapso sa hinapos nga bahin sa third period. Didto na milabaw ang Avengers sa  fourth quarter, 47-46 sa ‘back-to-back’ baskets ni Daniel Catinoy.

Ang three-point play ni Arnold Pestaño ug ingon man kang Ben Auman maoy nakabugnaw sa naglagiting nga kainit sa duwa sa Luigi-Sebandal.

Si Pestaño maoy nangu sa Avengers nga miburak og 17 puntos, gisundan ni Catinoy sa iyang 16 puntos ug Ranulfo Tupas nga adunay 10 puntos.

Ang Luigi-Sebandal gipangulohan sab ni Eman Pacquiao, kinsa mipupo’g 12 puntos, si Bernard Rogado miamot og 12 puntos, samtang si Sebandal mitampo’g 10 punts.

Ang mga duwa gipadagan ni league commissioner Geryl Bukiron inabagan nilang Lloyd Chavez ug Ramil Baclay ug ingon man nilang Chang Tejero, Eduard Escorial, Abel Bacalso ug Kenneth Tagalog sa Cebra.

Puntos Matag Usa

AVENGERS (59) – Pestaño 17, Catinoy 16, Tupas 10, Auman 6, Ygoña 6, Tantuan 4.

LUIGI-SEBANDAL (57) – Pacquiao 12, Rogado 11, Sebandal 10, Orendain 8, Monsanto 5, Mahilum 4, Duhaylungsod 2, Buliag 2, Incorporado 2, Ubas 2. (BANAT NEWS)