Lancers mobawos
CEBU, Philippines – Krusyal karon ang Game- 2 alang sa University of San Carlos Warriors ug maoy ilang tuyo nga mokulit og 2-0 nga bentaha sa ilang “best-of-five” finals series batok sa University of the Visayas Green Lancers sa 15th Cebu Schools Athletic Foundation, Inc. (CESAFI) basketball tournament karong gabii didto sa Cebu Coliseum.
Ang duwa sugdan sa alas-6 sa gabii.
Ang pagkulit og sagunsong duha ka daog dili imposible alang sa Warriors kay gani nakahimo man sila’g 6-0 sweep atol sa first round ug naputol kini sa labing una nilang pag-arangkada sa second round dihang gipakuratan sila sa Southwestern Cobras, 77-79.
Apan wala sab mahitabo karon nga season nga gisagunsonan og pilde ang Green Lancers bisan pa sa ilang 1-2 head-to-head match-up batok sa Warriors diin nagtabla sila sa 1-1 nga baraha human sa double round elimination. Hinuon, napilde ang Lancers sa overtime atol sa semifinal.
Mao karo’y laraw sa Lancers nga tablahon ang series sa 1-1 aron mas menos ang ilang bation nga presyur sa Game-3.
Ang Warriors ni coach Britt Reroma, adto lang gihapon mosalig sa opensa ug depensa sa ilang kugihan kaayong import nga si Shooster Olago.
Makasalig sab ang Warriors nilang Ian Jefferson Tagapan, rebounding king Charles Pepito, Ian Ortega, Victor Rabat ug Nico Magat. Kinahanglan sab nga mosuporta silang Kiefer Lim, Giovanni Laguyo ug Christian Maconocido aron matuman ang ilang gihandum nga 2-0 lead.
Si Olago mihimo’g 19 puntos sa Game-1, si Tagapan midugang og 15 puntos, samtang si Pepito adunay 10 puntos.
Itugyan sab ni Lancers coach Gary Cortes ang iyang pagsalig ngadto nilang Steve Cedrick Akomo ug June Kent Manzo, apan kinahanglan sab nga motabang sa opensa silang Francisco Arong, Alfred Codilla, Alywin Aguirre, Arvie Cabanero ug ang mga second stringers nga naglakip nilang Rey Suerte, Joshue Segumpan, Jerome Napao ug Vincent Mendoza. (BANAT NEWS)
- Latest
