Lancers, Warriors sugod na’s ilang title showdown

CEBU, Philippines – Sugdan na sa University of the Visayas Green Lancers ug University of San Carlos Warriors ang ilang “best-of-five” championship  showdown sa collegiate division sa 15th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.

Ang duwa gitakda sa alas-5:30 sa hapon human sa engkuwentro sa  Southwestern University Cobras ug University of San Jose-Recoletos Jaguars sa deciding match sa ilang “best-of-three” series alang sa ikatulong puwesto ug luna sa Visayas qualifying sa Philippine Collegiate Champions League (PCCL) sunod bulan didto sa Ormoc City.

Kini ang ikatulong pagbalik sa finals sa Warriors human sila nakasud niadtong 2006 ug 2007, apan napilde sila ngadto sa Green Lancers.

Si USC coach Britt Reroma  miingon nga  usa sila ka ‘underdogs’ sa maong series batok sa 10-time champions, apan kompiyansa siya tungod kay ila man nga gipilde ang Green Lancers sa makaduha ka higayon sa tulo nila ka  duwa niini nga season.

Midaog ang  USC sa una nilang engkuwentro, 79-69, apan ang  Green Lancers mibawos pinaagi sa paglubong og 31 puntos sa Warriors, 74-43 sa ilang rematch. Sa ikatulo nilang panag-abot, ang Warriors midaog pinaagi sa overtime, 79-75 atol sa semifinals.

Usa sa labing maayong ‘offensive weapon’ sa Warriors mao ang ilang import nga si Shooster Olago, apan kinahanglan sab siya og suporta gikan   ni Charles Pepito ug  sa gunners sama nilang Ian Tagapan, Nico Magat, Ian Ortega ug Victor Rabat. Sa frontcourt,  ang Warriors   Maverick Suarez, Dolan Adlawan ug Fil-Canadian  William McAloney.

Ang Green Lancers kinsa gipangulohan sa ilang import nga si Steve Cedrick Akomo, makasalig sab nilang June Kent Manzo, Alfred Codilla, Francisco Arong ug bigmen nga silang Leonard Santillan, Arvie Cabanero ug Alwyn Aguirre. Makapabor sab ang Green Lancers sa bench tungod sa presensiya nilang Rey Suerte, Joshue Segumpan, Jerome Napao ug Vincent Mendoza. (BANAT NEWS)