SHS-Magis Eagles kampiyon
CEBU, Philippines – Gihurot pagpabuhagay sa Sacred Heart School-Ateneo de Cebu Magis Eagles ang ilang abilidad ug enerhiya aron maangkon ang ilang ikatulong title batok sa University of Cebu Junior Webmasters, 88-53 sa deciding game sa “best-of-three” finals sa 15th Cebu Schools Athletic Foundation, Inc. (CESAFI) basketball tournament kagahapon didto sa Cebu Coliseum.
Sayong mitusik ang Magis Eagles diin makaduha sila nga mihimo og makabungog nga scoring run. Una atol sa second period dihang milusad kini’g 22-14 run aron molabaw og 18 puntos sa halftime, 42-24. Nasundan kini og laing 13-0 run pagsugod sa third period diin halos singko minutos nga wala makalihok ang iskor sa UC. Naputol kini human sa duha ka free throws ni John Bryl Cuyos, 26-55 sa oras nga 5:08 sa third quarter.
Si Alex Visser maoy nangu sa Magis Eagles sa iyang 23 puntos uban sa 10 ka rebounds. Didto siya mamuntos og maayo sa third period dihang gihan-okan siya sa mga assists gikan ni Jelour Travis Mantua, kinsa midugang og 12 puntos.
Ang shooting guard nga si Jed Colonia, kinsa mitampo’g 20 puntos maoy napiling MVP, si Eroll Pastor miamot og 13 puntos alang sa Magis Eagles.
Sila si Colonia, Pastor ug Mantua nakahig sa Mythical Five uban nilang Floilan Mangubat sa UC ug Raul ‘Jancork’ Cabahug sa University of the Visayas.
Ang Junior Webmasters, kinsa emosyonal human sa duwa tungod sa presensiya ni Chancellor Candice Go, kinsa nagsakay sa wheelchair gipangulohan ni Mangubat sa iyang 15 puntos.
Matud pa ni UC coach Joever ‘Brad’ Samonte nga nagguba ang ilang game plan kay nangigo sa gawas ang Magis Eagles. Gumikan niini ilang giusab ang ilang depensa gikan sa ‘zone defense’ ngadto sa ‘man-to-man’. Apan wala lang gihapon nila mapugngi ang paglupad sa Magis Eagles.
Puntos matag usa
SHS-AdC (88) – Visser 23, Colonia 20, Pastor 13, Mantua 12, Bersaluna 8, Chen 5, Javelosa 4, Chua 3, Manaytay 2, P. Yu 2, Calumpang 1.
UC (53) – Mangubat 15, Gabisan 8. Umpad 7, Cuyos 5, Abejo 4, Malubay 3, Soco 3, Pando 1. (BANAT NEWS)
- Latest