Lesjorcinran unang nakapilde sa Lakers

CEBU, Philippines – Gamay apan makapuling. Mao kini ang mahulagway sa gipakitang duwa ni Lloyd Chavez dihang iyang gipangulohan ang LesJorCinRan ngadto sa kadaugan batok sa Lakers, 53-48 sa Second Conference sa LABA President’s Cup 2015 basketball tournament sa miaging gabii didto sa Barangay Banilad Sports Center, Mandaue City.

Si Chavez nga mipakita’g gilas, miiskor og game-high 20 puntos alang sa LesJorCinRan nga mirehistro og 21 puntos nga labaw sa halftime, 37-16.

Ang LesJorCinran nga maoy nikontrolar sa tibuok duwa nakakuha sab og suporta gikan ni  Barak Recto, kinsa miambit og 17 puntos alang sa ilang 3-1 nga baraha.

Ang Lakers nga nakatilaw sa una nilang pilde sa upat ka duwa, gipangulohan ni Marcial Marturillas sa iyang 15 puntos, gisundan ni Raymundo Carvajal nga adunay 11 puntos.

Sa laing aksiyon, ang Aunicaj ni Jun Arceo nagsolo na karon sa liderato human  makaipsot batok sa Team Monteroyo ni Dr. Raul Monteroyo, 70-68 sa duwa sa mga way pildeng koponan.

Ang beterano nga si Dodoy Rizane maoy nangu sa balanseng opensa sa Aunicaj  sa iyang 18 puntos, samtang sila si Noel Puerto ug Gelbolingo mitimbre’g 14 puntos matag usa. Si Geryl Bukiron mihimo sab og double figures pinaagi sa iyang 10 puntos.

Naglabaw unta ang Monteroyo, 65-61 sa katapusang 4:00 minutos sa fourth quarter, apan nalansang ang ilang iskor nga gipahimuslan sab sa Aunicaj ni playing coach Tony Alcover aron masakmit ang labaw, 69-65 sa nahabiling 1:28  sa duwa.

Mahatod unta ang duwa sa overtime dihang usa ka palito lang ang labaw sa Aunicaj, 69-68 sa himalatyong segundos, apan si Tawing Grafe pakyas pag-execute og maayong play.

Si Grafe mao gihapon ang topscorer sa Monteroyo sa iyang 19 puntos, si Rex  Gonzaga mitikdol og 17 puntos, samtang si Lindsay Bontilao adunay 10 puntos.

Puntos Matag Usa

Unang duwa:

LESJORCINRAN (53) – Chavez 20, Recto 17, Lesin 6, Evangelista 4, Cinco 3, Pestaño 3.

LAKERS (48) – Marturillas 15, Carvajal 11, Herbito 5, Gonzaga 3, Jacalan 3, Oljol 3, Quiñahan 2, Alburo 2, Cena 2.

Ikaduhang duwa:

AUNICAJ (70) – Rizane 18, Puerto 14, Gelbolingo 14, Bukiron 10, Magale 4, Lagaras 3, Alcover 2, Arceo 2, Echavez 2, Colanse 1.

MONTEROYO (68) – Grafe 19, Gonzaga 17, Bontilao 10, Baunsit 8, Hatamosa 7, Monteroyo 5, Ramos 3, Ecot 1. (BANAT NEWS)