SHS-Ateneo nakatabla

CEBU, Philippines - Human maleksiyon sa ilang kapildihan sa Game-1, milupad pagbalik ang Sacred Heart School-Ateneo de Cebu Magis Eagles, kinsa midagit og 63-53 nga kadaugan batok sa University of Cebu Junior Webmasters aron makatabla sa ilang ‘best-of-three’ championship series sa juniors division sa 15th Cebu Schools Athletic Foundation, Inc. (CESAFI) basketball tournament kagahapon didto sa Cebu Coliseum.

Tungod sa 1-1 nga baraha, ang Magis Eagles ug Junior Webmasters mag-abot pa sa katapusang higayon ugma alang sa ‘do-or-die’ battle sa alas-3 sa hapon.

Unang midaog ang Junior Webmasters sa Game-1 niadtong Martes  diin ilang gilubong og 10 puntos, ang Magis Eagles,  73-63 pinaagi sa usa ka upset.  Niadtong higayona wala  sila magdahom nga makahimo sila pagpugong  nilang Jed Colonia, Wayne Kirby Bersaluna ug Errol Pastor.

Apan   kagabii, nabalikan sa kusog silang Pastor ug Bersaluna ug gawas pa niana,  mipakita sab og maayong performance silang Travis Mantua ug John Emmanuel Chen, kinsa pulos miiskor og double figures.

Si Pastor mitusak og walo ka sunod-sunod nga puntos aron molabaw og singko puntos, 54-49,  samtang si Bersaluna  mikompleto sa iyang three-point play alang sa ilang 57-49 nga abante sa wala pa sila moposte sa ilang kinadak-ang labaw nga 10 puntos, 61-51 sa basket ni Christian Manaytay sa nahabiling 46 segundos sa duwa.

Katapusang naglabaw ang Junior Webmasters sa   iskor nga  47-46 gikan sa triple ni Froilan Mangubat sa 6:39 ang oras nga nahabilin sa fourth period. 

Apan human sa basket ni Pastor, 48-47 wala na makasustenir ang UC ug hinay-hinay na silang mikolapso.

Sa wala pa mausab ang opensa sa UC diin naglabaw sila’g kuwatro puntos sa third period,36-32, mihimo’g sagunson nga singko puntos si  Chen  lakip ang usa ka triple aron mosikit ang Magis Eagles, 37-38.

Si Pastor maoy nahimong best player human moiskor og  23 puntos ug makapaisa sa kilay nga 23 sab ka rebounds ug duha ka steals, samtang sila si Mantua ug Colonia mitampo’g  11 ug 10 puntos matag usa.

Si Mangubat mao lang gihapon ang nangu sa Junior Webmasters pinaagi sa iyang  18 puntos. Si Jason Florence Abejo midugang og 13 puntos, apan si Luigi Konrad Gabisan, kinsa mihimo’g 13 puntos sa Game- 1, napugngan lang ngadto sa kuwatro puntos kagabii.

Wala na sab makahuygo ang idlas nilang  point guard   nga si  Gelmart Umpad nga  igo lang miiskor og dos puntos gikan sa iyang 14 puntos, lima ka rebounds ug lima ka steals sa Game-1. (BANAT PALARO)