Viloria midayeg ni Nietes
CEBU, Philippines - Gidayeg og maayo ni Brian ‘The Hawaiian Punch’ Viloria si two-division world champion Donnie ‘Ahas’ Nietes sa ALA Boxing Gym human sa kulbahinam nilang sparring session sa miaging adlaw didto sa Amerika.
“Great work, great guy,” matud pa ni Viloria agi’g pagtamod ni Nietes. “I know he’s going to do well on the 17th. We were helping each other prepare for our respective matches, and it was great work. I like the guy.”
Sila si Viloria ug Nietes miabag sa tagsa-tagsa nila ka preparasyon kay pareho man silang moaway karong Oktubre 17.
Si Nietes modepensa sa iyang WBC light flyweight title batok sa Mehikanong si Juan ‘Pinky’ Alejo sa labing unang Pinoy Pride event sa Amerika didto sa StubHub Center sa Carson City, California, samtang si Viloria magsagubang og mas bug-at nga hagit gumikan kay hagiton niini ang bag-o pang gikoronahang pound-for-pound king nga si Roman Gonzalez sa Nicaragua didto sa Madison Square Garden sa New York.
Bisan pa og siya maoy dehado, masaligon kaayo si Viloria sa iyang kahigayonan nga modaog gumikan kay iya man nga gipangandaman og maayo ang maong away.
Si Viloria nagbitbit og 36-4 record, samtang si Gonzalez, nga kasamtangang nagkupot og duha ka flyweight titles, wala pa’y pilde sa 43 ka away. (BANAT NEWS)
- Latest
