Titulo tuyo sa UC

CEBU, Philippines - Suwayan sa University of Cebu Junior Webmasters ang pagsakmit sa titulo  batok sa defending champion Sacred Heart School-Ateneo de Cebu Magis Eagles, apan kinahanglan sila nga mangandam sa dakung gubat sa dihang mag-abot  na sab sila alang sa Game-2 sa “best-of-three” championship series  sa juniors division sa 15th Cebu Schools Athletic Foundation, Inc. (CESAFI) basketball tournament karong  adlawa diha sa Cebu Coliseum.

 Mihimo og dakung upset ang UC sa Game-1 niadtong Martes human ilang giparot ang Magis Eagles, 73-63 bisan pa sa kalisud sa maong tahas  tungod kay ang ilang kontra mao may inilog.

Ang kadaugan sa UC mao sab ang miputol sa   11-game winning streak sa Magis Eagles, kinsa nagpas-an karon og bug-at  nga bagahi aron morekober.

 Usa ka maayo nga duwa karong hapon maoy maghatag sa Junior Webmasters og lain na sab nga  korona.             Katapusang   nidaog og titulo ang  Junior Webmasters niadto pang 2008  dihang ilang gipilde ang University of the Visayas Baby Lancers.

Sama sa gihapon, ang Junior Webmasters makasalig  nilang Froilan Mangubat, Jason Florence Abejo ug Luigi Konrad Gabisan.

Mopakita na sab sa iyang kaabtik ang gamitoy’ng   point guard nga si Gelmart Umpad, kinsa miiskor og 14 puntos atol sa ilang kadaugan sa Game-1.

Bisan pa sa iyang kakuwang sa gitas-on,  si Umpad nakahimo gihapon og lima ka rebounds ug lima sab ka steals.

Malaumon si UC  Juniors coach Joever  ‘Brad’ Samonte nga masustinihan nila ang ilang gihimong depensa batok sa Magis Eagles.  Una sa tanan, dili nila tugotan nga makahuygo og maayo ang point guard sa Magis Eagles nga si Jed Colonia. 

Gawas ni Colonia, gikinahanglan sab nila ang suporta gikan nilang Patrick Yu, Errol Pastor ug Wayne Kirby Bersaluna. 

Sa main game, ang  Southwestern University Cobras ug ang University of San Jose-Recoletos mag-abot sab  alang sa Game-2 sa kaugalingon nilang “best-of-three” series alang sa ikatulong puwesto.

Ang undermanned nga Cobras maghangad gihapon nilang Mark Jayven Tallo, Jan Michael Auditor, Jesse Bautista, Melvin Holper, Anton Pardo ug Jovanie Luz.

Sa laing bahin, ang Jaguars  pangulohan nilang Ralph Dinolan, Kevin Villafranca, Mark Labares, Jaybie Mantilal ug Nelvin Navarra. (BANAT NEWS)