Mythical 5 Selection ni Castro usa ka "consuelo de bobo"

Tanan nakong mga higala dinhe sa Sugbo, nagtuo gyud nga ang Gilas Pilipinas maoy mahimong kampyon sa 2015 FIBA Asia Championship didto sa Changsha City, Hunan province sa China kay lagi kuno bisan og kapila na ka higayon kita mapilde sa China, lingin man ang bola. Wala pa man sab hinoon ako makakita'g bola nga kuadrado mga amigo ko.

Naa man tingali bola nga kuadrado pero kanang bola nga literal natong sabton nga "pag-uto-oto" ug pag-ulog-ulog kay mahimo man kitang mo-ingon " praises from all corners" busa kay kana eskina, malagimit upat kini ka eskina ug kini maoy kuadrado. Kana rabang uban nga matang sa pagdayeg sagol sab kana plastic o sa tagalog pambobola.

Kini hinoong pagka-pili ni Jayson Castro dili kini bola kay ato mang nakita kung gi-unsa niya pagduwa didto sa FIBA Asia diin sa iyang gitas-on nga 5-7, iyang gihimo ang tanan aron tabangan ang Gilas nga maka-abot sa finals.

Anugon lang gyud kaayo na kung diin atong gikinahanglan ang iyang labing maayong duwa, siya maoy labing bati nakaduwa ug sa iyang otso puntos sa finals, daw dili kita makadawat nga mao kadto'y mahitabo sa usa ka Jason Castro kinsa duha na  ka higayon nga napili nga best point guard sa Asia, ang una niadtong 2013 diin na-angkon sa Gilas ang luna sa World Cup didto sa Spain.

Sa akong obserbasyon,  mas maayo pa tingali unta kung didto siya sa first round ug sa second round wala makahuygo kay sa finals nga usa siya sa atong gilauman nga magdala'g bida sa atong nasud.

Apan lagi kay sa duwa aduna may modaog ug aduna sa'y mapilde, ato lang dawaton kay kita man maoy natumngan sa pilde. Magmalipayon kita kung modaog apan dili sab nato ingnong nga daw nadat-ogan kita sa kalibotan tungod lang kay kita napilde.

Aduna pay daghang torneyo nga atong apilan diin didto na sab kita manikaysikay aron ma-angkon nato ang dungog sa natad sa basketball.       Makita man nato sa duwa nga lupig kita tungod mas tag-as ang China kung itandi kanato. Di man tingali ma-ingon nga "lutong macau" kay makita man sab nga naningkamot silang Yi Jianlian nga usa ka NBA player kinsa nagduwa kanhi sa Milwaukee Bucks.

Hinoon motuo ako nga pabor gamay ang referee ngadto sa China apan tungod kay didto man ang duwa sa China, mao kana'y gitawag og hometown decision ug mao lang kana ang bugtong kalipay sa usa ka host nation.

Kadtong pasangil ni Gilas patron Manny V. Pangilinan bunga lang kadto sa kahimangud o pasiunang mensahe aron kung kita mapilde makakita kita'g rason ug daghan ang molaban kanato sa emotional aspect sa duwa dili didto sa hardcourt.

Mitaho si MVP sa social media kung gi-unsa sa China pagpanikas aron makabentaha sila dili lang sa ilang gitas-on hasta pa gyud sa laing paagi.

Gitawag ni MVP ang maong pagpanikas nga  ‘bad breaks’ ug sa iyang twitter, si MVP masuk-anon nga mikundena sa gibuhat sa China sa pipila ka mga “unlucky incidents” sama pananglit sa pagkalangay sa bus nga mohatud kanila sa benyu tungod kay wala kuno ma-charged ang electric bus. Gisaway sab ni MVP ang wala paghatag og tickets ngadto sa mga coaching staff.

Daan nang gihisgotan ni Gilas coach Tab Balwin ang posibleng himoon nga dirty tactics sa China apan lisud kaayo kining pruybahon ilabi na sa usa ka international competition nga nakataya sa ang relasyon ug diplomasiya sa mga nasud nga misalmot sa maong torneyo.

Daghan gyung Pinoy fans sa Gilas ang nagduda nga gisabotahe kita sa China ilabi na niadtong miaging gabii sa wala pa ang finals diin ang gikatakdang duwa batok sa Japan gi-uswag ngadto sa 10 pm imbes unta himoon kining 9:30 pm sumala pa sa unang pahibalo.

Midaog ang China sa finals 78-67 ug na-angkon ang luna sa Rio de Janeiro Olympics sunod tuig didto sa  Rio de Janeiro sa Brazil.

MISCELLANEOUS. I met a bunch of my Paisanos from the towns of Poro, San Francisco and Tudela in the Camotes islands where we had a luncheon meeting last Friday. They are engaged in a Customs Brokerage business namely; Orlando L. Bartolene, Melvin Gubalane, Juneth Estillore, Renato Agustinez, Tina Puso and Mila Romero.