Lancers batok Cobras

CEBU, Philippines – Magsangka karon ang topseed University of the Visayas Green Lancers ug sa defending champion   Southwestern University Cobras sa krusyal nga mga  duwa nga maoy motak-op  sa seniors division semifinals sa 15th  Cebu Schools Athletic Foundation, Inc. (CESAFI) basketball tournament diha sa Cebu Coliseum.

Ang  Lancers  nga  napilde pinaagi sa overtime batok sa Universeity of San Carlos Warriors, 75-79  niadtong  Huwebes sa gabii   kinahanglan nga modaog batok sa Cobras sa ilang duwa nga gitakda sa alas-5:30 sa hapon aron moabante sa finals nga walay komplikasyon. Apan mag-ampo sila nga modaog sab ang Warriors sa duwa nila batok sa University of San Jose-Recoletos Jaguars sa  alas-3:45 sa hapon.

Daghan ang nagtuo nga ang UV ug USC maoy mag-abot sa finals, apan adunay mga probable scenarios nga masuhong kini.

Unang posibilidad kun ang Jaguars  modaog sa Warriors og labing menos kuwatro puntos ug ang  Lancers mapilde sa Cobras, maoy mag-abot sa finals ang USC ug USJ-R.

Sa samang higayon, kun ang Jaguars modaog sa Warriors og labing menos kuwatro ug ang Lancers modaog sa Cobras, ang USJ-R maoy moabante sa final batok sa UV.

Apan kun ang Warriors ug Cobras modaog, ang USC ug UV maoy mag-abot sa finals.

Pabor kaayo ang Lancers, kinsa mihimo’g 2-0    sweep   sa  Cobras tungod kay   duna   sila’y   import nga si Steve Cedrick Akomo.

Gawas ni Akomo, ang Lancers  daghan sab og kasaligan sama nilang Leonard Santillan, Francisco Arong, Alfred Codilla, June Kent Manzo ug Alwin Aguirre nga moataki sa undermanned nga Cobras nga pangulohan nilang  Mark Jayven Tallo, Jesse Bautista, Anton Pardo, Michael Auditor, Giovannie Luz ug Melvin Holper.

Sa laing bahin, ang Warriors magsandig nilang Shooster Olango, Ian Tagapan, Nico Magat, Victor Rabat, Ian Ortega ug William McAloney sa ilang pakigsangka sa Jaguars nga gibitoonan nilang Kevin Villafranca, Ralph Dinolan, Miguel Gastador, Nelvin Navarra, Mark Labares ug Ricky Peromingan.

Sa pasiunang duwa sa alas-2 sa hapon, ang UV Baby Lancers ug ang USC Baby Warriors magtagakay  alang sa ikatulong puwesto sa juniors division. (BANAT NEWS)