Ranuco mibaswat sa Baby Warriors
CEBU, Philippines - Usa ka dakung rally ang gipasiugdahan ni Jomari Ranuco sa fourth quarter diin mihimo siya’g sagunsong 10 ka puntos aron agakon ang University of San Carlos Baby Warriors ngadto sa 75-58 nga kadaugan batok sa University of San Jose- Recoletos Baby Jaguars sa 15th CESAFI kagahapon didto sa Cebu Coliseum.
Milabaw unta ang Baby Jaguars og otso puntos, 37-29 sa halftime, apan mikolapso sila sa fourth period human ang Baby Warriors nangigo sa ilang outside shooting.
Ang three-pointer ni Ranuco maoy hingpit nakapalabaw sa Baby Warriors, 53-49 ug didto magsugod ang pagpanginit sa outside shooting. Mihimo’g 18-1 run ang Baby Warriors sud lang sa singko minutos sa final period.
Na-outscore sa Baby Warriors ang Baby Jaguars, 46-21 sa second half sa kombinasyon nilang Ranuco, Alde de Gracia Mendez, Briedyn Aleyth Smith ug Jolo Pakanna.
Si Mendez maoy nangu sa 5-2 nga Baby Warriors sa iyang 14 puntos, samtang si Ranuco midugang og 13 puntos, sila si Smith ug Pakanna adunay 10 puntos matag usa.
Silang John Kirk Gonzaga ug Jude Benedict Teleron mao sab ang nangu sa 4-3 nga Baby Jaguars nga parehong miposa’g 14 puntos, gisundan ni Joshua Renz Ortiz sa iyang 10 puntos.
Adunay special game karong alas-5 sa hapon diin magtakus pag-usab sa second round ang University of the Visayas Green Lancers ug ang USJR Jaguars. (BANAT PALARO)
- Latest
