Cobras, Webmasters mag-abot na gyud

CEBU, Philippines - Gipaabot nga usa ka maanindot     ang masaksihan dihang magsangka na gyud karong adlawa ang defending champion  Southwestern University Cobras ug ang mas gagmay, apan mas agresibo ug abtik nga University of Cebu Webmasters sa 15th Cebu Schools Athletic Foundation, Inc. (CESAFI) diha sa Cebu Coliseum.

Ang Cobras-Webmasters showdown sugdan sa alas-6:45 sa gabii.

Bisan anaa na sa second round sa elimination ang torneyo, apan mao pa kini ang unang panagbagat sa Cobras ug Webmasters  karon nga season.

Gikatakda unta silang magsangka niadtong Agosto 22, apan ang duwa gikanselar gumikan kay ang coliseum gigamit sa usa ka politikanhong kalihukan.

Ang Cobras (4-2) ug Webmasters (3-3) parehong gikan sa daog ug buot  nilang tapuson ang first round match-up sa usa ka daog  aron mao kini maghatag kanila’g inspirasyon sa sunod nilang mga sangka. 

Sama sa laing higpit nga managkaribal nga teams, aduna sa’y mabulokon nga kasaysayan ang SWU ug ang UC  kay sila  maoy nagbagat sa 2011 Finals diin midaog sa ilang ikaduhang CESAFI title ang Webmasters human ilang gitapos ang  best-of-five finals sa 3-2.    

Karong gabii,  paningkamotan sa  Webmasters  nga modaog batok sa Cobras nga sa ilang pagtuo dili imposible tungod kay pareho silang wala’y import.

Ang Cobras bag-o lang mikulit og upset batok sa title contender University of San Carlos Warriors, 79-77 pinaagi sa buzzer-beating triple ni Jovanie Luz sa nahabiling 0.1 segundo   sa duwa.

Sa samang paagi, ang Webmasters midaog  niadtong Martes batok sa University of Southern Philippines Foundation Panthers, 73-61.

     Sa sangka sa juniors division,  ang USC Baby Warriors makigbatok sa University of San Jose- Recoletos Baby Jaguars sa alas-5:15 sa hapon. (BANAT NEWS)